Жуырда облыстық «Jetisý» газеті бас редакторының орынбасары Нүсіпбай Әбдірахым мен «Огни Алатау» газеті бас редакторының орынбасары Забира Сайдильдина Еңбекшіқазақ ауданының әкімі Әлібек Жақанбаевтың қабылдауына кіріп, өзара пікірлесті. Әңгіменің өзегі облыстық газеттердің қазіргі кезде атқарып жүрген жұмыстары жайында болды. Газет пен оқырман арасындағы байланысты жандандыру жайына да көңіл бөлінді.
«Jetisý» мен «Огни Алатау» – облыстың рухани айнасы. Газет беттерінде өңірдің өзекті мәселелері жүйелі сараланады. Осылайша қос газет пікірлер мен көзқарастар мінберіне айналуда. Жер жаннаты атанған Жетісу жерінің тыныс-тіршілігі ұдайы газет назарында.
Табысы ерен, тарихы терең Еңбекшіқазақ ауданында атқарылып жатқан жұмыстар аз емес. Аграрлық саланың өркендей түсуі соның дәлелі. Өндіріс пен өнеркәсіпте де өсу қарқыны байқалады. Өнім өндіру ырғақтары қалыбын берік сақтауда. Осының бәрі аудандағы береке-бірліктің, нәтижелі тірліктің арқасы. Содан барып әлеуметтік мәселелердің дұрыс шешім табуы қамтамасыз етіліп отыр.
Аграрлық аудан болғандықтан өңірде ауылшаруашылығын дамыту кеңінен жолға қойылған. Мұндағы шаруалар жаңа технологияларға ден қоюда. Соның арқасында сапалы өнім алуға мол мүмкіндік туып отыр. «Алтын Адамның» отанындағы рухани істер мен мәдениет те көпшілік көңілінен шығуда десек, артық айтқандық емес.
Кемел келешекке үндейтін рухани құралдың бірі – облыстық газеттер. Сондықтан оқырман санының азаймайтыны анық.
– Сіз Алакөл ауданынның әкімі қызметін атқарған кезде де рухани саланы жандандыруды басты назарда ұстадыңыз. Дәстүрлі басылымдар таралымының көбеюіне ықпал еттіңіз. Сондай игілікті істерді одан ары жалғастырады деген сенімдеміз, – деді «Жетісу» газеті бас редакторының орынбасары Нүсіпбай Әбдірахым.
Бұдан кейін Талғар ауданына барған қос газеттің басшыларын аудан әкімі Қайдар Әбдіханов қарсы алып, кең көлемді ой-пікір өрбітті.
– Халық саны жылма-жыл қарқынды өсіп отырған ауданымызда баспана салу, жарықтандыру, жолдарды жасау, ауызсумен қамтамасыз ету сынды әлеуметтік маңызды жұмыстар үзіліссіз атқарылып келеді. Өзім басшылыққа келгелі бергі уақытта ауылдық округтерді түгелге дерлік аралап, тұрғындармен кездесіп, маңызды мәселелер түйінінің тарқатылуына баса көңіл бөліп отырмыз. Алматыдай мегаполиске жақын аудан болғандықтан инфрақұрылымды жақсарту, инвестиция тарту басты назарда. Жүзеге асып жатқан жұмыстар аз емес. Оны елге танытуда баспасөздің орны ерекше. Жетісудың айнасына айналған қос басылыммен тікелей байланыста болып, ауданда атқарылып жатқан жұмыстарды жариялап, насихаттап отырудың маңызы зор болмақ, – деді аудан әкімі Қайдар Әлиханұлы.
Өз кезегінде сөз алған «Огни Алатау» газеті бас редакторының орынбасары Забира Сайдильдина ғасырлық ғұмыры бар ата басылымдарда аталған ауданның аграрлық, өнеркәсіптік дамуындағы жарқын істерді көрсетуге мол мүмкіндік барын ашып айтты.
Осы күні қос басылым бас редакторларының орынбасарлары Іле ауданының әкімі Бағдат Қарасаевпен де кездесіп, кеңінен сұхбаттасты.
– Аудан елді мекендері Алматы сияқты алып мегаполиспен іргелес, тіпті қоян-қолтық араласып жатыр деуге болады. Соған орай қай сала бойынша да даму мүмкіндіктері жоғары. Екінші шетінен алғанда, балдырғандарды мектеппен, балабақшамен, тұрғындарды үймен қамту сияқты мәселелерде туындап жататын өзіндік қиындықтар да аз емес. Мүмкіндіктерді ретімен пайдалана отырып барлық мәселені өз ретімен шешуге күш салып келеміз, – деген Бағдат Әбілмәжінұлы облыстың бас басылымдары журналистерімен тығыз ынтымақтастық, түсіністік жағдайында жұмыс істеп келе жатқандарын айтып, ризашылық сезімін білдірді. Өз кезегінде Забира Дайранқызы қай істе болсын тырнақ астынан кір іздеуге тырыспай, іргелі ауданда жүзеге асып жатқан жақсы істерді жарқырата көрсетуге дайын екендіктерін жеткізді.
Дәл осындай кездесулер Жамбыл мен Қарасай аудандарының әкімдіктерінде де өткізіліп, жарасымды әңгіме өрбіді.
Халықтың көзі, құлағына айналған баспасөз бен билік арасындағы байланыс бұдан былай да нығая түсеріне үміт басым.
Болат МӘЖИТ
Ұлбосын ИСАБЕК
