«Әлеуметтік сала – мемлекеттің басым бағыттарының бірі және қай кезде болмасын бірінші кезекте тұруы тиіс» деп Мемлекет басшысы Қасым-Жомарт Тоқаев айтқандай, бұл саланың жұмысы қашанда өзекті. Соған байланысты, бүгінгі күні әлеуметтік саланың әлеуеті артып, мемлекет тарапынан әлеуметтік сала қызметкерлеріне де көп көмек көрсетіліп келеді. Ағымдағы жылдан бастап жалақасы да, мәртебесі де өсу үстінде.
Әрине, елімізде мұндай жасалып жатқан оң өзгерістер әлеуметтік қызметкерлер жұмысын одан әрі жандануына үлкен септігін тигізуде. Десек те «әлеуметтік қызметкер» дегенді бірі білсе, енді бірі біле бермейді. Әлеуметтік сала бойынша әлеуметтік қызметкерлердің атқарып жатқан жұмыстары орасан зор. Облысымыз бойынша осындай арнаулы әлеуметтік қызмет көрсететін мекеменің бірі – «Қамқор» Талдықорған арнаулы әлеуметтік қызмет көрсету орталығы».
Мекемеде 88 қызмет алушыға арнаулы- әлеуметтік қызметтің 8 түрі бойынша қызмет көрсетілуде. Орталықтағы тәрбиеленіп жатқан балалар бір отбасындай болып, бір-біріне үйренісіп кеткен. Сондай береке-бірліктің арқасында әр мерекені қалыс жібермей, тыңғылықты дайындалып, кез келген уақытта сырттан келген қонақтарымызға өз өнерін көрсетуді әдетке айналдырған.
Мекеме балаларды өз отбасына қайтару мәселесімен де айналысып келеді. Соның нәтижесінде 2020 жыл мен 2021 жылдың І тоқсаны аралығында 7 бала өз отбасына қайтарылды. Сондай-ақ, 7 тәрбиеленушіміз Тараз қаласына отбасы тәрбиесіне жіберілді. Балаларды отбасы тәрбиесіне жіберу – біздердің басты жетістігіміз деп есептейміз.
«Қамқорлықтағылардың» денсаулық жағдайын жақсарту – біздің ең бірінші мақсатымыз болып саналады. Осы мақсатта жыл сайын тәрбиеленушілеріміз ЛФК, иппотерапия, физиотерапия сынды міндетті медициналық-сауықтыру қызметтерін алады. Сонымен бірге тәрбиеленушілермен дефектолог, логопед, психолог, еңбек нұсқаушы сынды арнайы мамандар жұмыс істейді. Бала мен дәрігердің бірлесе жұмыс істеуінің арқасында уақыт өте келе тәрбиеленушілердің дамуы, сөйлеуі, ортаға бейімделіп кетуі байқалады.
Балалардың денсаулығы алдыңғы орында болғандықтан, тәрбиеленушілеріміздің бірегейін Алматы қалалық А. Сызғанов атындағы ұлттық-ғылыми хирургиялық орталығына, одан бөлек, С. Асфендияров атындағы «Ақсай» республикалық клиникалық балалар ауруханасында емдеуге, Талдықорған қалалық көпсалалы ауруханасында ота жасатуға барымызша атсалысамыз.
Айта кетерлігі, әке-шешесі бар балалар бізде арнаулы әлеуметтік қызмет алып жатқанымен, ата-анасымен де қарым-қатынасын үзбейді. Тіпті, мекеме мамандары да ата-анамен тығыз байланыс орнатқан. Балалар да бейнеқоңырау арқылы хабарласып, сағыныштарын басып отырады. Бұл бала эмоциясының оң болуына әсер етеді. Тәрбиеленушінің көңіл-күйі көтеріңкі болса, денсаулығына да әсер беретіні сөзсіз.
Спорт – денсаулық кепілі. Осы мақсатта республика, облыс, қала көлемінде өткізілетін әр жарыстан қалыс қалмай, тәрбиеленушілерімізді қатыстыруға тырысамыз. «Спешиал олимпикс» басшыларының ұйымдастыруымен өткізілетін әрбір жарыс біздің балаларсыз өтпейді десем қателеспеймін. Сонымен қатар, жыл сайын балалар мерекесінде қала көлемінде ұйымдастырылатын қолөнер бұйымдары жәрмеңкесінде біздің мекеме «Ең үздік қолөнер бұйымдары» Алғыс хатымен марапатталғанын атап өтуге болады.
Тағдыр балаларымызға үлкен сынақ берсе де, мойымай, өмірге құштарлықтарының әр күн сайын арта түсетініне жоғарыда айтылған мысалдар үлкен дәлел болып табылады.
«Өмірге наразылық танытқанша, мәнді өмір сүруге тырысыңыз» демекші, барымызды бағалап, қолымыздағыны аялай білейік.
Меруерт ЖИЕНБЕКОВА,
«Қамқор» ТАӘҚКО КММ-нің
директоры
