Елді мекендерді газдандыру, «Мүліктік меншік иелерінің бірлестігі» институтын енгізу жөніндегі реформаны жүзеге асыру, санитарлық тазалық пен көгалдандыру жұмыстары қалай жүріп жатыр? Облыс әкімі Амандық БАТАЛОВТЫҢ тікелей тапсырмасы бойынша аталған мәселелерді бүге-шігесіне дейін талқылау мақсатында селекторлық жиын өтті.
Облыс әкімінің бірінші орынбасары Лаззат Тұрлашов төрағалық еткен жиынға облыстық энергетика және тұрғын үй-коммуналдық шаруашылығы басқармасы, әділет және статистика, экология департаментінің басшылары қатысты. Селекторлық байланысқа аудан, қала әкімдері мен коммуналдық мекемелердің басшылары шықты. Күн тәртібіндегі мәселелер бойынша облыстық энергетика және тұрғын үй-коммуналдық шаруашылығы басқармасы басшысының міндетін атқарушы Қайрат Бұлдыбаев пен орынбасары Бағлан Абылқасымовтың баяндамалары тыңдалды.
Белгілі болғандай, облыстағы 742 елді мекеннің 474-і газдандыруға жатады. Бүгінде 156 елді мекен газдандырылып, 1,2 миллион адам газға қол жеткізген. Талдықорған қаласын газдандыру жұмысы аяқталған. Барлығы 54,3 мың абонент табиғи газға қол жеткізіп, қазіргі кезде 23,7 мыңнан астам абонент газға қосылған. «Жұмыспен қамту жол картасы – 2020» бағдарламасы аясында 3,5 млрд. теңгеге 7 жоба іске асырылуда. Мемлекеттік жекеменшік әріптестік тетігі негізінде 5 жоба аяқталуға таяған. Нәтижесінде 44,2 мың адам табиғи газға қол жеткізетін болады. Биыл 19 жаңа жобаны жүзеге асыру үшін 6,4 млрд. теңге қаржы бөлініп, «Ауыл ел бесігі» бағдарламасы шеңберінде 3,4 млрд. теңге қаржы қарастырылған.
«Нұр Отан» партиясының Жол картасын орындау аясында аймақтың 47 елді мекенін газдандыру үшін биыл жобалық-сметалық құжаттаманы әзірлеу басталды. Сонымен қатар Райымбек және Кеген аудандарының елді мекендерін газдандыру үшін 2020 жылы «Шелек-Кеген-Нарынқол» магистральды газ құбырының құрылысы» үшін ТЭН әзірленіп, оған облыстық бюджеттен 52,1 млн. теңге қаржы бөлінген. Биыл жобалық-сметалық құжаттама әзірлеу жоспарланған. Нәтижесінде 17,4 мың халқы бар 23 ауыл газдандырылмақ, газ құбырының ұзындығы 227 шақырымды құрайды.
Жиында аудандарда абоненттерді газға қосу жұмыстарының төмен деңгейде жүріп жатқаны айтылып, әкімдерден мұның себеп-салдары сұралды және оған нақты жауаптар алынды. Талдықорған қаласындағы көпқабатты үйлер мен шаһар маңындағы елді мекендерді тездетіп табиғи газға қосудың маңыздылығы талқыланып, бұл мәселеге айрықша көңіл бөлу қажеттігі міндеттелді. Талдықорған қаласы мен Алакөл ауданының әкімдеріне Талдықорған-Үшарал магистральдық газ құбыры бойынша шаруа қожалықтарымен жер учаскесін келісу жұмыстарын маусымның 1-не дейін аяқтау жүктелді.
Екінші мәселеге қатысты тыңдалған баяндамада бірқатар аудан мен облыс орталығында тұрғын үй реформасын іске асыру жұмыстарының баяу жүріп жатқаны сөз болды. Осыған байланысты әкімдерге тапсырмалар беріліп, жұмысты қатаң бақылауға алу қажеттігі міндеттелді.
Биылғы жоспарға сәйкес облыс аумағында 200 мың түп ағаш отырғызу көзделген. Аудан, қалалар берген мәліметке жүгінсек, 110,5 мың түп ағаш отырғызылған. Облыс әкімінің тапсырмасына сәйкес Қаратал және Ақсу аудандарында «Павлоний» ағашы егілген. Сондай-ақ, Қазақстан ғарыш сапары спутниктік геопорталында Талдықорған мен Алматы қаласынан 50 шақырым қашықтықта 791 күл-қоқыс орны анықталған. Әзірге олардың тең жартысы ғана жойылыпты. Осыған байланысты он күн бұрын арнайы комиссия тобы құрылып, қазір олар аудандардағы тазалықты бақылау үшін тексерістер жүргізуде.
Аталған мәселелерге байланысты ой қорытқан Лаззат Махатұлы елді мекендерді көгалдандырып, ағаш отырғызу жұмыстарын күшейту, күл-қоқыстың уақытылы тазаланып, санитарлық жағдайды сақтауға ерекше көңіл бөлу қажеттігін қадап тапсырды. Жиын соңында күн тәртібінде қаралған мәселенің бәрі облыс басшысының жіті бақылауында екені ескертіліп, тапсырмалар берілді.
Айгүл БАЙБОСЫНОВА
