Ел билігі уәкілетті ұйымдардың алдына азаматтардың цифрлық сауаттылығын 80 пайызға дейін жеткізу міндетін қойды. Осы орайда Ескелді аудандық халыққа қызмет көрсету бөлімінде бір ай ішінде 5 мыңнан аса мемлекеттік қызмет түрі электронды түрде көрсетілді. Ал, аудандық ХҚКО-на келіп қызмет алушылардың саны 3 мыңды құраған. Сонымен қатар, мемлекеттік қызметке электронды түрде қол жеткізудің оңтайлы тәсілдерін ұғындыру үшін бір ай ішінде 4 мыңға жуық кеңес берілген.
Қазіргі таңда әлеуметтік желілердің дәуірі жүріп, бар ақпарат айдан анық жарияланып, тегін кеңестер де дәл осы ғаламтор желісінде берілу үстінде. Біздің жұмыс тобы да осыны басшылыққа алып, Instagram желісінде «egov.kz_eskeldi» парақшасында аудан халқына «Электронды үкімет» порталының жұмысы турасында мағлұматпен бөлісіп, бағыт-бағдар беруде.
Бүгінгі күні мемлекеттік реестрде 687 мемлекеттік қызмет бар. Соның 659 қызметі мемлекеттік корпорация арқылы көрсетілсе, 629 қызмет «Электрондық үкімет» порталы арқылы қолжетімді. Халықтың «Egov» жүйесін пайдалануын жеңілдету мақсатында мамандар оңтайлы «Е-gov mobile» мобильді қосымшасын іске қосты. Қолыңыздағы ұялы телефон арқылы, мекеменің табалдырығын тоздырмастан, 50-ден астам электрондық қызмет пен сервисті пайдалануға болады. Қосымша уақытты үнемдеп қана қоймай, азаматтарға «Электронды үкімет» порталының тиімділігін түсінуге мүмкіндік береді. Сонымен қатар, мемлекеттік қызмет саласындағы сыйбайлас жемқорлық іс-әрекеттерінің алдын алатын басты құралға айналу үстінде.
Мекемеде азаматтардың өзіне-өзі қызмет көрсету бұрышы да жасақталған. Мақсат – тұрғындардың 80 пайызын еркін түрде қажетті мемлекеттік қызметке қол жеткізуін қамтамасыз ету. Осы орайда Қазақстан Республикасы Мемлекеттік қызмет істері агенттігінің облыс бойынша департаментінің мұрындық болуымен «Egov жаршысы» сынды ірі жоба жүзеге асырылуда. «Egov жаршысы» жобасының төңірегінде мемлекеттік қызметтердің 87 пайызға жуығы электронды іске асатын болса, қалған 106 қызмет түрі ХҚКО арқылы қағаз жүзінде көрсетілуде.
Электрондық цифрлық қолтаңба (ЭЦҚ) – қызметке қолжеткізу үшін керек бірден-бір құрал. Электронды қызметке жүгінбестен бұрын ЭЦҚ алу қажет. Себебі, кез келген салада электрондық цифрлық қолтаңба арқылы құжаттық айналым жүргізіледі. Тіпті алдағы уақытта мемлекеттік көрсетілетін қызметтердің тек «Электрондық үкімет» порталы арқылы жүзеге асырылуы күтілуде. «Egov жаршысы» жобасы – дәл осы электрондық цифрлық қолтаңба мен электронды қызмет түрлерін алуға жәрдемдесетін басты тетік.
Өңірдегі пандемиялық ахуалға байланысты ХҚКО-ның табалдырығын аттау үшін алдын ала жазылу шарт. Бұл өз кезегінде тұрғындардың уақытын ұрлайтыны хақ. Сол себепті, «Электронды үкімет» порталының тиімділігін пайдаға асырған абзал.
Бастапқыда қызмет алушылар үйреншікті қағаз түрінде қызмет алуды құп көргені рас. Уақыт көші автоматтандырылған жүйенің жеңіл әрі жүйелі жұмыс істейтінін дәлелдеп келеді. Сол себепті, өркендеудің өр биігіне шығуды көздеген қоғам электронды үкіметті қолданып үйренуде. Бүгінгі мемлекеттік қызметкерлер мен қызмет алушы азаматтар, электронды қызмет алуға бейімделуі шарт. Өйткені, цифрлық жүйеге көшу – заман талабы.
Ерасыл ИБРАИМОВ,
«Азаматтарға арналған үкімет» мемлекеттік корпорациясы» КЕАҚ облыс бойынша филиалы Ескелді аудандық халыққа қызмет көрсету
бөлімінің басшысы
