Еңбекшіқазақ ауданының шаруалары көктемгі егіс жұмыстарына қызу кірісті. Биыл өңірдегі 34100 гектар алқапқа дән егіледі.
– Ауа райының қолайсыздығы диқандарға біраз кедергі келтіргені рас. Қар мен жаңбырдан кейін жыртылған жерлер езіліп, дән себу жұмысы кешеуілдеді. Алайда шаруалар мүмкіндікті құры жібермеуде. Жұмыстың тоқтаусыз жүруіне бар жағдай жасалынуда. Шаруа қожалықтары 700 тонна жанар-жағармаймен қамтамасыз етілді. Техника да жеткілікті. Соның арқасында белгіленген мерзімде көктемгі егіс науқаны ойдағыдай аяқталады, – дейді аудандық ауылшаруашылық бөлімінің басшысы Ермек Жәкеев.
Бүгінде аудан бойынша шаруа қожалықтарының жалпы саны 10500-ден асады. Жыл өткен сайын диқандар жаңа технологияларды барынша игеріп, оны өз жұмысына кеңінен пайдаланып келеді. Солардың бірі ретінде Тескенсу ауылдық округіндегі «Дауыталы» шаруа қожалығын айтуға болады. Бұл шаруашылықтың қарауында 30 гектар жонышқа алқабы, 100 гектар жүгері бар. Олар тамшылатып суару әдістерін тиімді қолданады. Сол сияқты «Райымбек өнімдері» жауапкершілігі шектеулі серіктестігі де жақсы қырларымен көзге көрініп келеді. Қазір аталған ұжым 524 гектар алқапқа жүгері дәнін себуде.
Өткен жылы аудандағы ауылшаруашылық өнімдерінің жалпы көлемі 138 млрд. теңгеге жеткен. Биыл бұл көрсеткіш еселенеді деп күтілуде. Сол арқылы еліміздегі азық-түлік қауіпсіздігін қамтамасыз етуге өз үлестерін қоспақ.
Болат МӘЖИТ
Еңбекшіқазақ ауданы
