Балалық және жастық шағымды айтпағанда, ат жалын тартып мініп, еңбекке араласқаннан бергі 30 жылдан аса ғұмырым осы өңірде өтті. Тағдырыма ризамын, осы жылдар ішінде облыстың алты ауданында бірінші басшы болып, облыстық ауылшаруашылығы басқармасының жетекшісі, облыс әкімінің орынбасары қызметтерін атқардым. Ел ағаларының сенімі мен халықтың үмітін ақтау үшін барымды сала еңбек еткенім жұртшылық жадында.
Сонау 90-шы жылдары экономикамыз құлдырап, тәуелсіз елдің тұғырын қалай шайқалтпай ұстаймыз деген мәселе төтесінен тұрғаны мәлім. Міне, сол тұста мемлекет бюджетіне түсетін салмақты азайту үшін көптеген әкімшілік құрылымдарды тарқату жайлы солақай шешім қабылданғанын көзіміз көрді. Салдарынан, Талдықорған облысы мен өлкенің бірнеше ауданы таратылып, тұрғындар аса күрделі кезеңді басынан кешірген. Талдықорған облыс орталығы мәртебесінен айырылғаннан кейін онсыз да шатқаяқтап тұрған шаруа шалқасынан құлап, қаланың қантамырындай болған екі аккумулятор зауыты, киім тігетін фабрика, аяқкиім және ойыншық жасайтын, өзге де кәсіпорындар жұмысын тоқтатты. Жұмыссыз қалған жұртшылық күнкөріс қамымен өзге өлкелерге көшуге мәжбүр болып, жасыл желек жамылған әсем қала аз уақытта азып-тозып кеткен болатын.
2000 жылы Елбасының 60 жасқа толуына орай жеке қабылдауында болып, пікірлесудің сәті түскен еді. Ел жайы туралы әңгіме қозғалғанда мен Талдықорған қаласы мен осы өңірдің ауыр жағдайы туралы айтып, облыс орталығын Талдықорғанға көшіру төңірегінде көтеріліп жүрген мәселені тағы бір есіне салдым. Әр нәрсені байыппен шешетін Нұрсұлтан Әбішұлы бұл жайды білетінін, жуық арада халықты алаңдатқан мәселе шешілетінін құлаққағыс етті. Бүгіндері облыс орталығының Талдықорғанға көшірілуі турасында әркім әртүрлі әңгімелер айтып жүр ғой. Аталған шаруаға талай азаматтардың үлес қосқаны шындық. Дегенмен, қарлығаштың қанатымен су сепкендей, менің де бір үлесім болған шығар деп топшылаймын.
Сонымен, 2001 жылы Талдықорған жер жаннаты Жетісудың орталығы мәртебесіне ие болып, күлден қайта жаралатын феникс құсындай қайтадан түлеген болатын. Бұл жерде қаланы қалпына келтіріп, тамырына қан жүгіртуге Шалбай Құлмахановтың атқарған еңбегін айта кету керек. Облысқа басшылық жасаған Серік Үмбетов пен Аңсар Мұсаханов та бұл бағытта қыруар шаруа жасағаны анық. Ал өңір басшылығына Амандық Баталов келгеннен бері сол үрдіс соны лепке ие болып, облыс орталығы тіптен құлпыра бастағанын мен ғана емес, жалпы жұртшылық мақтанышпен айтып жүр. Бүгіндері Талдықорған өте талғампаздықпен жасалынған сәулет стилінде жаңадан бой көтерген әсем де еңселі ғимараттарымен ғана емес, көшелерінің тазалығымен, жасыл желектерінің молдығымен, адамдарының мәдениеттілігімен де ерекшеленеді. Осылайша, 20 жыл ішінде елімізде көрер көзге қуаныш сыйлайтын тағы бір қаланың жайқала өсіп келе жатқаны жанымызды жадыратады. Мерейлі жасың құтты болсын, тағдырыма айналған талды қала!
Асылмұрат ТҰРҒАНБЕКОВ,
Мемлекет және қоғам қайраткері,
Алматы облысының Құрметті азаматы
