Ақсу ауданының дала төсінде қызу еңбек басталды. Бұл туралы «Жетісу» газеті Ақсу ауданы әкімдігіне сілтеме жасап хабарлады.
Биылғы жылы да эпидемиологиялық күрделі жағдайға қарамастан ақсулық шаруалар егіс басында жүр. «Көктемнің әр күні жылға азық» дегендей, шаруа адамдары үшін әр сағат маңызды. Сол себепті егін басында еңбек қызуда.
Б.Сырттанов ауылдық округінде «Әлихан» шаруа қожалығы алғашқы болып төл дақыл — тәтті түбір егуді бастады. Бүгінгі күні шаруашылық 30 га алқапқа қант қызылшасын екті.
Айта кетейік, шаруашылық қант қызылшасымен қоса, арпа, майбұршақ, жоңышқа егумен айналысады. Жалпы, аудан бойынша биыл 3315 гектар қант қызылшасын себу жоспарланып отыр.
Мағжан ШЫНДӘУЛЕТ,
Ақсу ауданы әкімінің баспасөз хатшысы
Алматы облысы
Сурет ғаламтордан алынды
