Жолбарыс батыр ауылдық округіне қарасты Қанабек ауылының Мәдениет үйінде ауыл тұрғындарының басын қосқан жиын өтті. Қанабек ауылына газ желісінің жүргізілуі және жеке тұрғын үйлерді табиғи газға қосу, көктемгі дала жұмыстары, жерді пайдалану және қолдану жайы қаралған басқосуды аудан әкімі Қайрат Бұлдыбаев ашып, жүргізді. Бұл туралы «Жетісу» газеті хабарлады.
Көпшілік алдында сөз алған «Жетісу-Облгаз» ЖШС басшысы Рашат Имамадиев Қанабек ауылына газ желісінің жүргізілуін және жеке тұрғын үйлердің табиғи газға қосылу жайын егжей-тегжейлі түсіндіріп өтті. Оның айтуынша, биыл Қаратал ауданына қарасты 7 ауылға газ тартылмақ. Қанабек ауылынан басталатын игі жобаны сәтті жүзеге асыруда халықпен етене жұмыс жасайтынын жеткізді.
– Ең бірінші, газ қосылу үшін техникалық шарт жасалады. Соның ішіне 4-5 құжат кіреді. Үй өз атыңызда болуы керек. Жерге берілген мемлекеттік акт, газбен жылытуға арналған пештің құжаты болуы қажет. Газ орнататын компания техникалық шарт беруі тиіс. Сонымен қатар, облыс әкімдігі тарапынан әлеуметтік аз қамтылған азаматтарға, көпбалалы отбасыларға, 1,2-топ мүгедектеріне, соғыс ардагерлеріне жеңілдік жасалып, газ тартуға кеткен шығындарды 10 ай жеңілдікпен төлеуге жағдай жасалуда. Сіздердің әкімшіліктеріңізге хат жолдадық. Әкімдік тарапынан әлеуметтік аз қамтамасыз етілген азаматтардың тізімін аламыз. Газды биылғы жылы қосуды жоспарлап отырмыз, – деді «Жетісу-Облгаз» ЖШС директоры Рашат Имамадиев.
Оның айтуынша, үйге газ кіргізетін компаниямен әр тұрғын жеке келісімшарт жасап, сырттан үйге газ құбырын кіргізу, пеш орнату, қосалқы бөлшектерін бекіту секілді жұмыстардың сапалы атқарылуын талап етуі тиіс. Әр үйге газ кіргізу құны үй мен газ қондырғысының арақашықтығына, газ пешінің көлеміне, қосымша қызметтерге байланысты әртүрлі болуы мүмкін.
– Былтырғы жылы Қарабұлақ ауылына газ тартқанда әр үйге орнату құны шамамен 420-430 мың теңге болды. Биыл құбыр бағасы қымбаттады. Былтыр пешті 165 мың теңгеден алып орнатсақ, биыл ол 220-230 мың теңгенің көлемінде болып отыр. Сондықтан, биыл үйге толықтай газ орнатып беру құны 500-510 мың теңге шамасында болады деп жоспарлап отырмыз, – деді өз сөзінде Рашат Батайұлы.
Залдан сауал қойған ауыл тұрғындары үйінің ауласының кіре-берісіне қойылатын газ құбырының биіктігі 3,5 метр болатынын естіп, бұл жүк көлігімен шөп кіргізуге кедергі келтіретінін тілге тиек етті. Малмен күнелтіп отырған жұрт мүмкіндік болса газ құбырын биіктетіп беруін сұрады. «Azia Rc» ЖШС басшысының орынбасары Нұржан Бегалиев аулаға кіреберісте қойылатын газ құбырының биіктігі 3,5 метр, ал көшедегі биіктігі 5 метр болатынын, бұл мемлекеттік стандарт талаптарына сәйкес жасалғанын айтты. Газ тартуда заң шеңберінде тұрғындарға барынша көмек беруге әзір екенін білдірді. Алматы облысының энергетика және тұрғын үй-коммуналдық шаруашылық басқармасы басшысының орынбасары Бағлан Абылқасымов Қанабек және басқа да ауылдарға газ тарту әкімдік тарапынан жіті назарда болатынын айтып, барынша қолдау көрсетілетініне баса назар аударды.
Аудандық ауылшаруашылығы бөлімінің басшысы Ғалым Увалиев ауыл тұрғындарына көктемгі дала жұмыстарына дайындықты тағы бір мәрте пысықтап, жер кепкен сәтте егін егуге кірісу қажеттігін еске салды. Аудандық жер қатынастары бөлімінің басшысы Д.Ұзақбай ауылшаруашылығы жерлерін тиімді пайдалану және қолдану қажеттін айтып, жер сұраған азаматтар конкурсқа қатысып, жер алуға мүмкіндігі бар екенін жеткізді.
Қанабек, Айдар ауылының тұрғындары ауыл сыртында мал жаятын жер жоқ екенін, әкімдік иелігіне қарасты жерлер бірнеше жыл бұрын шаруа қожалықтарының иелігіне өтіп кеткенін жеткізді. Аудан әкімі Қайрат Бұлдыбаев бойдақ малды жайлауға шығару қажеттігін, ал сауын сиырларды жаятын жайылым мәселесін шешу жолдары қарастырылатынын айтты.
Асхат ӨМІРБАЕВ
Қаратал ауданы
Алматы облысы
Сурет ғаламтордан алынды
