Облыс аумағындағы елді мекендерді газдандыру бағдарламасын іске асыру аясында бүгінде 15 аудан мен қаладағы 156 елді мекеннің 1,2 миллион тұрғыны орталықтандырылған газ желісіне қосылып, Талдықорғанда газ желілерін тарту жұмысы толық аяқталды. Демек, жетісулықтар көгілдір отынның қызығын сезінді. Сонымен қатар, жергілікті жылумен қамту кешенін жаңғырту жобасы бойынша орталықтандырылған жылу жүйесіне бірқатар тұрғын үй мен әлеуметтік нысан қосылған.
Өткен жылы Талдықорған мен Қапшағай қалаларындағы үш қазандық көмір мен мазуттың орнына табиғи газды пайдалануға ауыстырылды. Сонымен бірге Ескелді ауданы, Қарабұлақ кентіндегі орталық жылыту қазандығын газға ауыстыру жобасы аяқталу алдында. Бұл нысанды жаңғыртуға облыстық бюджеттен 614 миллион теңге бөлінген.
– Жалпы, Ескелді ауданын газдандыруға облыстық бюджеттен 1,5 млрд.теңге бөлініп, 140 шақырымға газ желісі тартылып, 13 газ тарату қорабы орнатылды. Жұмыс осы жылдың мамыр айында аяқталмақ. Облыс әкімінің тікелей тапсырмасымен «ЖетісуОблГаз» ЖШС Қарабұлақ кентіндегі «Хомгаз» ЖШС-мен бірлесе отырып, кенттегі 150 үйге 300-350 мың теңге көлеміндегі жеңілдетілген бағамен газ құбырын кіргізіп, пеш орнатып берді. Сондай-ақ, тұрғындардың қаржылық жүктемесін төмендету үшін қазандық пен жинақтаушы материалдарға жұмсайтын қаражатын он айға бөліп төлеу ұсынылуда, – дейді облыстық энергетика, тұрғын үй-коммуналдық шаруашылығы басқармасы басшысының орынбасары Бағлан Әбілқасымов.
Жоспарлы жұмыстың нәтижесінде Қарабұлақ кентін жылумен қамтып отырған көмірмен істейтін орталық жылу қазандығының жанынан блокты-модульді корпус салынып, жылыту қазандықтары орнатылып, қажетті жабдықтар құрастырылуда. Қуаттылығы 20,6 ГКл жылу қазандығын орнату бойынша «Сұңқар – 2002» ЖШС жұмыс жүргізуде.
Демек, келесі жылыту маусымында Қарабұлақ коммуналдық мекемелері мен жеке тұрғын үйлер көмір орнына газды пайдаланатын болады. Осы арқылы ауаға тарайтын зиянды заттардың шығарылу деңгейі кем дегенде 52%-ға төмендейді. 32 көппәтерлі тұрғын үй, 25 мемлекеттік мекеме, 45 жеке кәсіпкерлік субъектісі және 1165 жеке тұлға жылумен қамтамасыз етіледі.
Қарабұлақ кентіндегі кентішілік жылу желілерін жаңғырту жоспары бойынша да, көпқабатты үйлерді орталықтандырылған жылу жүйесіне қосу жұмысы да кезең-кезеңмен жүргізілуде. Осыған дейін Акименко көшесіндегі №17 және Балпық би көшесіндегі №57 үйлер орталықтандырылған жылу жүйесіне қосылып, тұрғындардың алғысына бөленді.
Акименко көшесіндегі №17 үй тұрғыны, зейнеткер Нина Тарасенко «Қарабұлақ кентінде тұрғаныма бірнеше жыл болды. Жыл сайын бесінші қабатқа көмір мен отын тасып, шаңын бұрқыратып от жағып, көп қиындық көріп едік. Міне, орталықтандырылған жылу қазандығына қосылғалы көзіміз ашылды. Осындай мүмкіндік берген облыс әкімі Амандық Баталовқа алғысымыз көп», – десе осы үйдің тағы бір тұрғыны, Шоқан Уәлиханов атындағы мектептің оқытушысы Қастер Болат: «Мен бұл үйге көшіп келгелі 5 жыл болды. Басында үйді көмірмен, кейде, электр қуатымен жылытып мазамыз кетті. Жұмыста жүргенде, іссапарға кеткенде қауіпсіздікті ойлап алаңдаушы едік. Орталық жылу жүйесіне қосылғалы сол уайымның бәрі артта қалды», – деп ағынан жарылды. Жақында орталықтандырылған жылу жүйесіне 150 бала тәрбиеленетін «Айкүнім» балабақшасы, аудандық Мәдениет үйі қатарлы бірнеше нысан қосылып, жұрттың қуанышы еселенгенін көрдік.
Облыстық энергетика, тұрғын үй-коммуналдық шаруашылығы басқармасының ақпаратынша, бүгінде Балқаш, Қаратал, Көксу, Кербұлақ және Талғар аудандары елді мекендерінде газдандыру жұмысы жүргізілуде. Текелі қаласын газдандыру жұмысын бастау жоспарлануда. Сондай-ақ, мемлекеттік жеке әріптестік бағдарламасы аясында Үштөбе қаласы мен Ұйғыр ауданының үш елді мекенінде газ тарату желілерінің құрылысы қарқын алады.
Қажет АНДАС
Ескелді ауданы
Алматы облысы
