Алматы облысы әкімінің бірінші орынбасары Лаззат Тұрлашов Талдықорғанға кіреберісте бой көтеріп жатқан орталық жүзу бассейнінің құрылысын аралады. Әлемдік стандартқа сай салынып жатқан спорт ғимараты бітуге жақын. Әйтсе де құрылыстың кем-кетіктері баршылық. Бұл туралы «Жетісу» газеті хабарлады.
Облыс әкімі Амандық Баталов әр келген сайын жұмыстың кемшін тұстарын көрсетіп, құрылыс компаниясына нақты тапсырма жүктеп, сапасына көңіл бөлуді тапсыратын. Облыс басшысы көрсеткен кемшіліктердің түзетілуін Лаззат Махатұлы қадағалап, жұмысты ширату қажеттігін қадап айтты.
Нысанның жалпы ішкі жұмыстары тоқсан пайызға аяқталған. Тек суға секіру тұғырын көз тартатын бояуға бояп, жаттығу залдарындағы төбе жапсырмаларын жөнге келтіруді тағы да ескертті. Сонымен қатар, «ВИП» орындықтардың аралығы өте тар. Бір адамның жүріп-тұруына қиындық туғызады. Алдыңғы жағына қорғаныс белдемше темір де орнатылмаған. Мұны байқаған Лаззат Махатұлы көрерменге қауіп төндіретіндігін құрылыс компаниясы маманына ескертіп, тез арада ретке келтіруді тапсырды.
Ішкі жұмыстардағы бірқатар кемшіліктерді анықтағанан кейін сыртқы жұмыстарын да аралап көрді. Дәл қазіргі таңда сыртқы жұмыстар баяу жүруде. Абаттандыру жұмыстары қолға алынбаған.
Облыс әкімінің бірінші орынбасары спорттық ғимараттың сыртқы жұмыстарына көңілінің толмайтындығын жеткізіп, абаттандыру жұмыстарын жеделдетуді тапсырды. Ең бірінші, құрылыстан қалған үйінділерді тазартып, жер ылғалы кеуіп кетпей ағаш отырғызуды жүктеді. Одан кейін ескі ғимараттарды сүріп, орнын тазартуды тапсырды. Электр желілері мен су мәселесін және газға қосылу жүйесін тез арада шешуді қадап айтты. Ауа райының қолайлы кезін тиімді пайдаланып, сыртқы абаттандыру жұмыстарына күш жұмылдыруды талап етті.
Ришад ТҰРҒАНБАЙ
Алматы облысы
