Бүгінде тек ерлер немесе әйелдерге арналған мамандықтардың шегарасы жойылуға шақ қалған. Ер-азаматтар нәзікжандылардың жұмысын шебер меңгерсе, арулар да ауыр саналатын тірліктің бел ортасында жүр. Солардың бірі — «Сурмак» құрылыс фирмасының жобалаушы-құрылысшысы Нұрғайша Түйтебекова. Оның ыстығы мен суығы қатар жүретін құрылыс саласында жүргеніне 30 жылға жуықтады. Бұл туралы «Жетісу» газеті хабарлады.
Кербұлақ ауданына қарасты Басши ауылының тумасы Нұрғайша Сламбақықызы балаларын асырау үшін құрылыс саласына келген. Оқу оқиын десе, сәбилеріне қарайтын адам жоқ. Құрылыс – жұмысы ауыр, жауапкершілігі жоғары, тек ер азаматтарға арналған мамандық сынды. Соған қарамастан кейіпкеріміз бірте-бірте қара жұмысқа кірісіп кеткен көрінеді. Басында ауыр көрінген жұмысын бүгінде бес саусағындай біледі.
– Ең алғаш құрылыс нысанына келген кезім. Жанымдағы аға-әпкелер өз тілдерінде сөйлеп жатқандай көрінді. Содан бетон, арматура, шатыр, еден, қабырға деген сөздерді естігенде ерсі көрінетін. Тіпті, үйреніп кете алмайтындай болдым. Балаларымды, олардың болашағын ойладым. Сөйтіп жүріп өзімнің де «левкас», «штукатурка» деп сөйлеп кеткенімді аңғармай қалдым, – деген Нұрғайша осыдан 28 жыл бұрынғы бір оқиғасын есіне алып, күлді.
Кейіпкеріміздің өзінің саласы туралы сүйіспеншілікпен айтқанына қарап, қызықпай қоймайсың. Әр қаланған кірпіші, сыланған қабырғасы үшін кеудесін мақтаныш сезімі кернейді. «Мына үйлердің кафелін төсегенмін. Ана тұрған жатақхананың іргетасын құйысып едім», – деген ол зейнетке шықса да құрылыстан қол үзгісі келмейтіндігін айтады.
Нұрғайшаның бүгінде өз бригадасы бар. Мемлекеттен бөлек жеке тапсырыстарды да қабылдайды. Айлықтарына көңілі толады. Ең аз дегені 150-200 мың алған. Ал, алматылық құрылыс компаниясымен істегенде 250-300 мың айлық алған кездері болған.
Басында айтқанымыздай, құрылысқа әйелдердің екінің бірі бата бермейді. Құрылысшының нысандағы әр күні қауіп пен қатерге толы. Сан алуан оқыс оқиғалар кездесіп жатады. Соған қарамастан қара басын қатерге тігіп, күнде құрылыс нысанына келеді. Материалдық жағдайдан бұрын, жүрек қалауы болған сала Нұрғайша Сламбақықызының сана-сезімін баурап алған көрінеді. Ең бастысы, бірге жұмыс істеп жүрген жандарға деген сенімнің болуы дейді.
– Жұмысым өзіме ұнайды, елдің бәрі шенеунік бола бермейтіні белгілі. Халыққа баспана салып беретін адам да керек емес пе?! Бай бол, бағлан бол, әкім бол, құрылысшы бол, ісіңді адал атқарып, маңдай терің сіңген ақыңды алсаң болғаны, – дейді кейіпкеріміз.
Құрылысшы Нұрғайшаның қолтаңбасы Нұр-Сұлтан, Алматы қаласындағы баспана мен зәулім ғимараттарда қалған. Ол бастапқыда қыз баласына жат деп таңдаған жұмысы бүгінде үлкен сұранысқа ие екеніне әбден көзін жеткізді.
Апайымыздың үлкен ұлы да құрылыс саласында жүр. Қайрат Бектеров екеуі екі ұлынан тараған 6 немересінің қызығын көріп отырған сүйікті ата-әже.
Еңлік АРЫҚБАЙ
Сурет ғаламтордан алынды
