Облыста былтырғы пандемия кезінде көпшілікке көмек көрсеткен іскер әйелдер марапатталды. Облыстық іскер әйелдер кеңесінің отырысында қыз-келіншектерге Алғыс хаттар мен дипломдар табыс етілді.
Алдымен іскер әйелдер кеңесінің облыстық филиалының басшысы Римма Салықова кеңес қатарында 450-ден астам кәсіпкерлер мен саясаткерлер, қоғам, мәдениет, білім және әлеуметтік сала өкілдерінің бар екенін атап өтті. Әр аудандағы кеңесі филиалдары білім беру және қайырымдылық жобаларын жүйелі түрде жүзеге асырып келеді. Облыстық іскер кеңес басшысы пандемия кезінде көрсеткен көмегі үшін өңір әйелдеріне зор алғысын білдірді.
Облыстық кәсіпкерлер палатасының директоры Әсет Шаяхметов іскер жандарды Халықаралық әйелдер күнімен құттықтап, облыс әкімдігі мен өңірлік кәсіпкерлер палатасының Алғыс хаттарымен марапаттады. Өңірдің әлеуметтік-экономикалық дамуына, сондай-ақ, қайырымдылық мәдениетін дамытуға және іскер әйелдер кеңесінің қызметіне қосқан үлесі үшін Текелі қаласының іскер әйелдер кеңесінің төрайымы, «Алпамыс» ұйымының басшысы Райхан Сисекенова, «Дана» жекеменшік мектебінің құрылтайшысы Күләнда Батырбекова, Панфилов ауданының іскер әйелдер кеңесінің төрайымы, «Ирада Балық» ЖШС директоры Суриям Изимова, «Оңғарбаева» ЖК оқу орталығының жетекшісі Светлана Оңғарбаева, тағы басқалар марапатталды.
Әсет Шаяхметов келесі кезекте «Атамекен» ҚР ҰКП Төралқасы жанындағы іскер әйелдер кеңесі тағайындаған «Ару Ана» Бизнес премиясы» республикалық сыйлығын табыс етті. Сыйлық кәсіпкер әйелдердің экономикалық белсенділігін ынталандыруға бағытталған. Жыл сайын өңірлік деңгейде 17 награда және республикалық деңгейде Гран-при беріледі. Облыстағы «АруАна» сыйлығының алғашқы иегері «Бүркіт «ТЭК» ЖШС бас директоры, облыстық Өңірлік кеңесінің мүшесі Ләззат Ботабекова. Компания Райымбек ауданындағы көмір өндіретін негізгі кәсіпорындардың бірі. Ләззат Ботабекова аудан және облыс көлемінде көптеген игі істердің демеушісі болып келеді. Жыл сайын компания Райымбек және Кеген аудандарының тұрғындарына 300 тонна көмірді тегін таратады. Сондай-ақ, жүйелі негізде аз қамтылған отбасыларға көмек көрсетеді, дарынды жастарға білім беру гранттарын бөледі. Мәселен, 2020 жылы пандемия кезінде аудандық ауруханаға 500 мың теңгеден астам сомаға медициналық бақылау-диагностикалық құралдары мен дәрі-дәрмектер сыйға тартты.
Отырыста «Doc.kz» Әлеуметтік еріктілер орталығы «ҚБ директоры Лариса Котельникова Алтай өлкесімен Халықаралық экономикалық ынтымақтастық туралы, қаржылық өнімдері бойынша «Банк Центр Кредит» АҚ және «Халық банкі» АҚ өкілдері сөз сөйлеп, бизнес-тренер Әлібек Бұханов тренинг өткізді.
Одан әрі «Алтын Адам Жетісу шеберлер орталығы» қоғамдық бірлестігінің қызметі таныстырылды. Халықтық өнер шеберлерін біріктіретін қолөнершілер орталығы облыстық іскер әйелдер кеңесінің бастамасымен құрылды. Қоғамдық бірлестік төрайымы Динара Бәкірова жұмыс бағыттары туралы айтып, болашақ жоспарларымен бөлісті.
Іскер әйелдер кеңесінің биылға арналған жоспарларын айта келе Римма Аждарқызы әйелдердің кәсіби, рухани, тұлғалық өсуі бойынша оқыту тренингтері мен семинарлар үрдісін өткізу бойынша жұмыс жалғасатынын айтты. Сондай-ақ, кәсіпкер әйелдерді несиелендіру бойынша «Қамқор Ана» жобасын іске асыру жоспарлануда.
Айгүл БАЙБОСЫНОВА
