«Jetisy media» ақпарат алаңында Алматы облысы бойынша мемлекеттік кірістер департаменті түсіндіру жұмыстары басқармасының бас маманы Жанболат Өксікбаевтың қатысуымен «2021 жылғы салық кодексіндегі өзгерістер» тақырыбында брифинг өтті. Бұл туралы «Жетісу» газеті мәлімдеді.
Мемлекет басшысы 2020 жылдың 10 желтоқсанында «Салық және бюджетке төленетін басқа да міндетті төлемдер туралы» ҚР кодексіне (Салық кодексі) өзгерістер мен толықтырулар енгізу туралы ҚР Заңына қол қойды.
Өзгерістерде пандемиядан зардап шеккен шағын және орта бизнес субъектілері үшін бөлшек салықтың арнаулы салық режимін енгізу (2023 жылдың 1 қаңтарына дейін қолданылады); бөлшек салықтың арнаулы салық режимін қолдану және оны қолдану кезіндегі салықты есептеу тәртібі; салық кезеңі, декларацияны тапсыру және салықты төлеу мерзімі; бейнетіркеумен расталған БКМ қолдануды бұзу фактілері туралы салық органына хабарлаған тұлғаларға сыйақы беру заңнамасы сияқты бап пен тарау бар.
– 2021 жылдың 1 қаңтарынан бастап ҚҚС бойынша салық жеңілдіктері күшіне енді. Арнайы экономикалық аймақтардың аумағында қызметтің басым түрлерін жүзеге асыру кезінде өндірілген және өткізілетін тауарларды, жолаушыларды (қала/ауыл), қала маңындағы, аудан арасындағы, ауыларалық (облыс іші) қатынастарды автомобиль көлігімен тасымалдау жөніндегі қызметтерді, сондай-ақ, трамвайларды өткізу бойынша айналымдарды ҚҚС-тан босату көзделген, – деді өз сөзінде Жанболат Әбілтайұлы.
Баспасөз барысында жеке тұлғалардың мүлік салықтары мен жер салығын біріктіру, көппәтерлі тұрғын үйлердің меншік иелері үшін жер салығын жою жөнінде де айтылды.
Серік ҚАНТАЙ
Алматы облысы
Сурет ғаламтордан алынды
