«Nur Otan» партиясынан ҚР Парламенті Мәжілісінің депутаттығына үміткер, көпбалалы ана Әлия Әбсеметова желі қолданушылармен тікелей эфирде тілдесті.
Талай жұртқа үлгі болып жүрген қоғам белсендісі партияның өрелі жетістіктері мен атқарған шаруаларын, сайлауалды бағдарламасында көтерілген басым бағыттарды түсіндіре келіп, замандастарын дұрыс таңдау жасауға шақырды.
– «Nur Otan» партиясы – нақты істер партиясы. Оған анық көзім жетті. Елдің жайына болысып, қиын-қыстау сәттерде партиямыз қалтарыста қалмады. Кешегі пандемия кезінде, Мақтаралдағы апат кезінде оны нақты дәлелдей түсті. Алғаш рет елімізде партияішілік іріктеу өткізіп, шын мәнінде еліміздің демократиялық таңдауының аясы кеңігенін аңғартты, – деген Әлия Маратқызы өзінің көпбалалы ана екенін мақтанышпен айтты. – Ана бір қолымен әлемді тербетсе, екінші қолымен бесікті тербетеді. Қазақта ана қастерлі ұғым. Егер қазақ аналары белсенділігі жөнінен артта қалса, құрмет төрінен көрінетін ұлы Аналар болмас еді. Тізбектесек, Ұмай ана, Айша бибі, Домалақ ана, Жылауық ана, тағысын тағылар. Санамаласақ саусақ жетпейді. Міне, партия белсенді нәзікжандыларға мол мүмкіндік ашты. Бастысы, ананың орны қазақ қоғамында әлі төмендемегенін аңғартты. Праймериз осындай үлкен мүмкіндік берді. Сонысынан «Nur Otan» партиясы жаңашылдықтың жаршысы, нағыз демократияның бастаушысы болмақ.
Мұнан бөлек, желі қолданушылары үміткерге түрлі бағытта сұрақ қойып, тұшымды жауап алды. Мәселен, бір желі қолданушы белсенді анаға бәріне қалай үлгеретіні жөнінде сұрады. Сонда үміткер: «Жанымда мені қолпаштайтын жандар барында, маған сенген халқым барында бәріне үлгеруім керек. Халық талабы сол, партия міндеті сол. Ел өркені жайқалсын десеңіз «Nur Otan» партиясына дауыс беріңіз», – деп сөзін түйіндеді.
Мәулен ӘНЕРБАЙ
