Екі айдан астам уақыт қозғалыссыз қалған теміржол қатынастары 1 маусымнан бастап өз жұмысын бастағаны белгілі. Бүгінде Алматы облысындағы теміржол бекеттерінен күніне 8 пойыз өтуде. Жолаушылардың карантин ережелерін қатаң сақтауы және олардың қауіпсіздіктері өте маңызды. Осы орайда Үштөбе стансысындағы желілік полиция бөлімі індетке қарсы әртүрлі іс-шара ұйымдастыруда.
– Теміржол вокзалдарында карантин шараларын сақтау туралы қаулы шығарғаннан бастап жолаушылар арасында, ғимарат ішінде карантин ережелері қатаң сақталуда. Яғни, вокзалға бетпердесі бар адамдар ғана кіргізіледі. Есіктің кіреберісінде олардың дене қызуы өлшенеді. Барлық жерге антисептик құралдары қойылған, – дейді желілік полиция бөлімінің бастығы, полиция подполковнигі Рымбек Иманғалиев.
Кассалар жұмысы таңғы сағат 9.00-ден кешкі 18.00-ге дейін белгіленген. Билет сатып алу, вокзалға отыру кезінде 1 метр ара қашықтық сақталуы тиіс. Желілік полиция бөлімінің бастығы, полиция майоры Мұрат Шынғожинның айтуынша, карантин кезінде теміржолдарда заңбұзушылық айтарлықтай азайған.
Карантиндік шаралардың сақталуына құқық қорғау саласындағы мамандардың қосқан үлесі зор. Күн-түн демей қызмет етіп жүрген тәртіп сақшыларына өз кезегінде халық та алғыс білдіруде. Бір мақсат, бір мүдде жолында еңбек еткеннің арқасында карантин кезеңінде тұрақтылық сақталуда.
Меруерт МАХМҰТЖАН
Қаратал ауданы
Алматы облысы
