Бақтыбай ауылындағы С.Сейфуллин атындағы орта мектепте түлектерге орта білім туралы аттестат табыстау кеші өтті. Салтанатты кешке мектеп директоры Серік Шүйкембаев қатысып, жас түлектерді мерейлі қуаныштарымен құттықтап, ақ жол тіледі.
Еліміздегі эпидемиологиялық жағдайға байланысты өткен мектеп бітіру кешінде барлық санитарлық талаптар сақталды. Ұстаздар да, түлектер де арнайы медициналық бетперде мен қолғаппен жүрді. Бар-жоғы жарты сағатқа созылған рәсімде мектеп ауласы қайта-қайта дезинфекцияланды.
Өз кезегінде аттестаттарын табыстаған мектеп директоры Серік Шүйкембаев:
– Бүгін — әрбір отбасы үшін, әрбір ата-ана мен ұстаз үшін зор қуаныш. Себебі, өздеріңіз үкілеп өсіріп, үлкен өмірге жолдама берген балаларыңыз енді ер жетіп, үлкендердің қатарынан бой көрсетуде. Сіздердің осы бір қуаныштарыңызбен бөлісіп, ақ жол тілеу мақсатында араларыңызға келіп отырмыз. Балаларыңыздың өмірлік мұраттары асыл болып, ата-ананың көз қуанышына айналуына тілектеспіз, – деп ақжарма тілегін жеткізді.
Түлектер де ұстаздарына арнаған өлең жолдарын оқып, ән шырқады. Сондай-ақ салтанатты жиында мектеп әкімшілігі мектептің қоғамдық жұмысына атсалысып, ұрпақ тәрбиесіне бірлесе үлес қосқан бір топ ата-аналарды Алғыс хатпен марапаттап, мектеп басшысы түлектерге аттестаттарын салтанатты түрде табыс етті.
Жалпы мектепті 34 оқушы аяқтап, үлкен өмірге қадам басты. Оның 3-уі «Алтын белгі» иегері. Ал «Үздік аттестатқа» 3 оқушы ие болды. Мектеп ұжымы мен ата-аналар түлектерге алдағы Ұлттық бірыңғай тестілеуден сүрінбей өтіп, қалаған оқу орнына түсуге тілектестік танытты.
Жанна ҚАУРАНБЕКОВА,
С.Сейфуллин атындағы орта мектептің қазақ тілі мен әдебиеті пәні мұғалімі
Ескелді ауданы
Алматы облысы
