Талдықорған қаласындағы «Жастар» саябағында орналасқан үлкен Ту көптен бері жоқ. 4 маусым — Мемлекеттік рәміздер күнінде де 92 метрлік тұғыр бос тұр. Қала тұрғындары тарапынан: «Талдықорғанда Ту жоқ, Ту қайда кеткен?» — деген сауал көптеп қойылуда. Осыған байланысты Талдықорған қаласы әкімдігі әлеуметтік желіде пост жариялады.
«Талдықорған қаласындағы «Жастар» саябағында орналасқан Қазақстан Республикасының Мемлекеттік Туына қатысты қысқа ақпарат: қатты жел кезінде трос үзіліп, бекітпелері сынды. Алматы қаласынан арнайы мамандарды шақырдық. Олар қазір жөндеу жұмыстарымен айналысып жатыр. Жақын күндері жалау орнатылады», — деп жазды Талдықорған қаласы әкімінің баспасөз хатшысы Нұр Қанатұлы.
Айта кетейік, Талдықорған қаласындағы Ту Тәуелсіздіктің 25 жылдығына орай орнатылған еді. Шараға Алматы облысының әкімі Амандық Баталов қатысып, сөз сөйлеген болатын. Рәміздердің 1992 жылы қабылдануына байланысты Ту тұғырының да биіктігі 92 метр болып жасалған.
«ЖЕТІСУ-АҚПАРАТ»
