Қапшағай қаласының маңында ерлі-зайыптылар мінген дельтаплан құлады. 24 жастағы әйел жарақат алып, ауруханаға жеткізілді.
«31 мамыр кешкі тоғыздар шамасында «Алматы-Өскемен» тасжолының 82-ші шақырымында, яғни, Бақанас ауылына бұрылар маңда екі кісілік дельтапланның құлағаны жөнінде хабарлама келіп түсті. Ұшу құралы — жекеменшік. 1996 жылғы азаматша зардап шегіп, Қапшағай қаласының ауруханасына жеткізілді», — делінген Алматы облыстық төтенше жағдай департаменті баспасөз қызметінің хабарламасында.
Ұшқыштың сөзінше, олар шамамен 5-10 метр биіктікке көтерілген кезде дельтапланның қозғалтқышы өшіп қалған. 1979 жылғы азамат ұшу құралын шамасы келгенше басқара отырып, жолдың жиегіне құлаған. Оқиға орнына төтенше жағдай қызметінің 10 маманы мен 3 техника барған.
«ЖЕТІСУ-АҚПАРАТ»
