Алматы қаласының бас санитар дәрігері Жандарбек Бекшин той-томалақ өткізуге болмайтынын тағы да айтты. Бұл жайында «Tengrinews.kz» тілшісі жазды.
Онлайн-брифингте Жандарбек Бекшинге журналистер тарапынан «Алматыда той және банкет өткізуге рұқсат етіле ме?» деген сауал қойылды.
— Жоқ. Бүгінде Алматыда тамақтану орындарына жұмыс істеуге рұқсат етілді. Бірақ түрлі банкет, мерекелік шаралар, ұжымдық шаралар дейік, қоғамдық тамақтану орындарында өткізуге тыйым салынған, — деп түсіндірді ол.
Еске салайық, бұған дейін Алматы қаласының бас санитар дәрігері Жандарбек Бекшин шаһарда COVID-19 вирусын жұқтырғандардың саны не себепті өсіп жатқанын мәлімдеген еді. Онда ол індеттің өршуін қалаға кіретін жолдардың ашылуымен және өз еркімен анализ тапсыруға келген адамдардың артуымен байланыстырды.
«ЖЕТІСУ-АҚПАРАТ»
