Текелідегі Қора өзеніне байқаусызда құлап, ағып бара жатқан үш жасар бала құтқарылды.
2017 жылы 4 ақпанда туған Сағат Ниса Ақылсерікқызының қазір денсаулығы қалыпты.
Ағысы асау Қора өзенінің бұлқынысынан сәбиді жергілікті тұрғын Дәурен Жарқынбеков алып шықты. Ерік пен ерлік — егіз. «Ерлік — білекте емес, жүректе» дегендей, су жағасында досымен отырған Дәурен ағып бара жатқан сәбиді көргенде, өзенге жанұшыра секіріп түсіп, асау толқынмен арпалысып, Нисаны алып шыққан. Небәрі 19 жастағы Дәурен Жарқынбеков — нағыз елжандылық танытқан ер десек жарасады.
Балаға — жаңаша ғұмыр, ата-анаға — қуаныш сыйлаған Дәуреннің ерлігі — баршаға үлгі. Жаңалықты естіген жұрт ел мақтанар ер көп болсын десіп жатыр.
«ЖЕТІСУ-АҚПАРАТ»
