«Алматы облысында тағы 7 адам коронавирустан жазылып шықты. Олар — Іле, Жамбыл, Еңбекшіқазақ аудандарының тұрғындары», — деп хабарлайды Алматы облысы әкімінің баспасөз қызметі.
Олардың барлығы 23 сәуірден бері Еңбекшіқазақ ауданаралық көпсалалы ауруханасында тиісті ем қабылдаған. Қазір барлығының жағдайы жақсы. Сонымен, Алматы облысында COVID-19 инфекциясынан айығып шыққандар саны 11 мамыр, сағат 5:00-дегі жағдай бойынша 70-ке жетті.
Мұның алдында Алматы облысында коронавирустан 14 адам айығып шыққан еді. Олардың 2-еуі – Кербұлақ, 1-еуі – Іле, 1-еуі – Талғар, 10-ы – Еңбекшіқазақ аудандарының тұрғындары. Жазылып шыққандардың үлкені — 72 жаста, кішісі — 7 жаста. Олардың да қазіргі жағдайы жақсы.
Өкінішке қарай, коронавируспен ауырған 1 адам Талғар ауданында тіркелді. Науқас бұрын науқастанған адаммен қарым-қатынаста болған. Науқас қазіргі уақытта Еңбекшіқазақ ауданаралық көпсалалы ауруханасының жұқпалы аурулар бөлімінде жатыр. Онымен қарым-қатынаста болған тұлғалар анықталып оқшаулануда, олар КВИ-ға зертханалық зерттеуден өтеді. Эпидемиологиялық тексеру жалғасуда.
11 мамыр, сағат 5:00-дегі ресми мәлімет бойынша, Алматы облысында қауіпті індетке шалдыққандар саны 183-ке жетті. Еліміз бойынша 5090 адам ауырып жатыр. Қаза тапқандар — 31. Оның ішінде адам өлімі көп тіркелген — Алматы қаласы.
«ЖЕТІСУ-АҚПАРАТ»
Сурет ғаламтордан алынды
