Өткен аптада ғана Алматы облысының бірнеше ауданын аралап, індет ошақтарындағы жағдаймен танысқан бұрынғы Денсаулық сақтау вице-министрі Камалжан НАДЫРОВҚА коронавирус жұқтырды деген диагноз қойылды. Бұл туралы ҚР Денсаулық сақтау министрі Елжан БІРТАНОВТІҢ әлеуметтік желідегі парақшасында арнайы ақпарат жарияланды. Онда басқа қызметке ауысуына байланысты Камалжан Надыров вице-министр лауазымынан босатылғаны, алайда сол аралықта оның қауіпті індетті жұқтырып алғаны анықталған.
«Кеше Үкімет қаулысымен Камалжан Талғатұлы Надыров басқа жұмысқа ауысуына байланысты Денсаулық сақтау вице-министрі қызметінен босатылды. Алматы қаласында коронавирустық инфекция кеңінен тарап, жағдай қиындаған соң Қоғамдық денсаулық сақтау басқармасының қазіргі басшысы Тілеухан Шілдебайұлы Әбілдаев отставкаға кету туралы өтініш білдірген болатын. Қаладағы команданы күшейту мақсатында басқарма басшысы лауазымына К.Надыровты тағайындау жоспарланған еді.
Алайда кеше кешкісін К.Надыровқа коронавирустық инфекция жұқтырған деген диагноз қойылды, қазір ол емделу үшін ауруханаға жатты. Әріптесім Камалжан Талғатұлының тез сауығып кетуіне тілектеспін және қолдау білдіремін!
Осы жағдайға байланысты Алматы қаласы әкімінің келісімімен Т.Әбілдаевтың отставкаға кету туралы өтініші тоқтатылды.
Жалпы, Алматыдағы COVID-19 қатысты жағдай мемлекет және қала басшылығының ерекше бақылауында. Бүгін таңғы мәлімет бойынша мұнда 678 адамның инфекция жұқтырғаны анықталды, скрининг нәтижесінде науқастардың жартысына жуығы медицина қызметкерлері екені белгілі болды. Орталық қалалық клиникалық ауруханадағы індеттің ошағы оқшауландырылды, барлық пациенттер, коронавирустық инфекция диагнозы расталған қызметкерлер қаладағы стационарларға орналастырылды және емделуде. Аталған аурухананың ғимараттары толық дезинфекцияланады, стационар содан кейін ғана науқастарды қабылдауға кіріседі.
Камалжан Надыров өткен аптада инспекциялық іссапармен өңірлерге, атап айтқанда Қарағанды, Алматы, Жамбыл облыстарына және Алматы қаласына барды. Ол аралаған медициналық мекемелердің арасында карантиндік нысандар да болған», — деп жазылған министрдің желідегі ақпаратында.
Айта кетейік, Камалжан Надыров Алматы облысының Еңбекшіқазақ, Іле, Қарасай аудандарында болып, індет ошақтарындағы жағдаймен танысып, дәрігерлерге бірқатар тапсырма жүктеген болатын. Бұрынғы вице-министрдің жанында Алматы облысы әкімдігінің өкілдері, денсаулық сақтау басқармасының басшысы, облыстың бас санитары, аудан мен түрлі мекеменің басшылық құрамы және журналистер болды.
«ЖЕТІСУ-АҚПАРАТ»
