Қазақстан Президенті Қасым-Жомарт Тоқаев жыл сайынғы дәстүрлі Жолдауын 28 қазанда түске дейін жариялайды, – деп хабарлайды 7-su.kz ақпараттық порталы.
Бұл туралы Мемлекет басшысы X (бұрынғы Twitter) әлеуметтік желісіндегі ресми парақшасында мәлімдеді. Қазіргі уақытта стратегиялық маңызы бар құжаттың мәтінін дайындау, пысықтау жұмыстары белсенді жүріп жатқаны айтылды. Ел дамуының келесі кезеңіндегі экономикалық, әлеуметтік және саяси реформалардың негізгі бағыттары осы бағдарламалық құжатта толық ашылады.
Мемлекет басшысының халыққа арнайтын Жолдауы жай баяндама емес, елдің әлеуметтік-экономикалық дамуын айқындайтын басты стратегиялық құжат. Мұнда Парламентке, Үкіметке және жергілікті атқарушы органдарға алдағы жылдарға арналған нақты міндеттер жүктеледі.
«28 қазанда түске дейін жылдағы дәстүрге сай Қазақстан халқына Жолдауымды жариялаймын. Қазір осы маңызды құжаттың мәтінімен жұмыс істеп жатырмын», – деп жазды Қасым-Жомарт Тоқаев.
Жолдау аясында ұсынылатын бастамалар қоғамдағы өзекті мәселелерді шешуге, азаматтардың әл-ауқатын арттыруға бағытталады.
