Түркітілдес журналистер қоры Қазақстандағы барлық лицей, гимназия, жалпы білім беретін мектептегі 2-11-сынып оқушылары арасында «Жастар – елдің болашағы» тақырыбында республикалық «Жас журналистер» байқауын өткізді.
«Үздік мақала», «Үздік жүргізуші», «Үздік фотосюжет» номинациялары бойынша ұйымдастырылған байқауға еліміздегі барлық облыс, аудан, аймақ, ауылдардан жүзден аса оқушы қатысты. Олардың еңбегін арнайы құрылған қазылар алқасы сарапқа салды.
Республикалық байқаудың нәтижесінде жетісулық өрендер топ жарып, үздіктер қатарынан көрінді. «Jetisy` Media» ақпараттық алаңында Түркітілдес журналистер қорының өкілдері журналист Сәрби Әйтенова, Гүлжан Қызайбай байқаудың мақсатын түсіндіріп, үздіктерді марапаттады. «Үздік жүргізуші» номинациясы бойынша І орынды Талдықорған қаласындағы № 28 IT мектеп-лицейінің 4-сынып оқушысы Алаш Мұхитұлы иеленді. Көксу ауданы Мұқыры ауылындағы Қ. Жапсарбаев атындағы мектептің 10-сынып оқушысы Меруерт Қойшы «Үздік мақала» аталымы бойынша І орынды еншіледі. Болашақ журналистерге «Түркітілдес журналистер қоры» қоғамдық қорының Президенті Нәзия Жоямергенқызының арнайы дипломы табыс етілді.
Ұйымдастырушылар оқушылардың шығармашылығына көңіл бөліп, бағыты мен бағдарын айқындаған жетекші мұғалімдер Анар Жекебаеваға, Майра Байболатоваға Алғыс хат тапсырып, жас өрендерге ақжарма тілегін айтып, сәттілік тіледі.
«Жас журналистер» байқауындағы үш номинация бойынша іріктелген 30 қатысушы Алматы қаласында өтетін 1 апталық тегін Журналистика курсына қатысады.
Е. БАУЫРЖАНҚЫЗЫ
