«Алматы облысында коронавирус инфекциясын жұқтырғандар санатына тағы екі адам қосылды. Олар – Жамбыл ауданы, Мыңбаев ауылының тұрғындары», — деп хабарлайды Алматы облысы әкімінің баспасөз қызметі.
Олардың біріншісі – 1997 жылы туған азамат дәрігерге жүгінгенде өкпесінің қабынуы анықталып, соған байланысты коронавирусқа вирусологиялық анализ алынған. Өкінішке қарай, қорытындысы оң болып шыққан. Екіншісі – 1975 жылы туған әйел адам наурыздың 1-7 аралығында Ташкентте, 18 наурызда Алматы қаласында болған. 13 наурызда инфекционист дәрігерге құрғақ жөтел, дәм және иіс сезуінің бұзылуына шағымданған және ол мұрны біткеніне байланысты 6 сәуірден өз бетінше антибиотик қабылдағанын айтқан. Дәрігерлердің қарауынан кейін провизорлық бөлімге жатқызылып, вирусологиялық анализ алынды, қорытындысы – оң.
Сырқаттардың екеуі де Қарасай аудандық орталық ауруханасының инфекциялық бөлімінде жатқызылды.
Екі науқастың жалпы 130 адаммен байланыста болғаны белгілі болды, олардың барлығы Мыңбаев ауылындағы аурухананың провизорлық бөліміне оқшауландырылып, әрқайсысынан вирусологиялық анализ алынды.
Сөйтіп, 14 сәуір күнгі сағат 21.00-дегі жағдай бойынша коронавирус инфекциясымен ауырғандар саны 24-ке жетті, олардың бесеуі жазылып шықты.
«ЖЕТІСУ-АҚПАРАТ»
Сурет ғаламтордан алынды
