Еңбекшіқазақ ауданындағы тоғыз науқас оның алдында вирус жұқтырған адамның туысқандары болып шықты. Шұғыл шара қолданылып, олардың бәрі дереу аудандық аурухананың инфекциялық бөліміне жатқызылды. Сонымен қатар, осылармен байланыста болды деген басқа адамдар да жаппай бақылауға алынды. Біз Еңбекшіқазақ аудандық ішкі саясат бөлімінің басшысы Момынжан Исламовпен хабарласқан едік.
– Вирус жұқтырғандар саяжай аумағынан шығып отыр. Мұнда – «Алтын адам», «Көксай», «Алтын алма» және «Береке» деп аталатын шағын елді мекендер бар. Олардың арасы бір-біріне тым жақын. Мұнда 9 мыңдай адам тұрады. Сондықтан ауру жұқтырғандар Көксайдан шықса да, ауданның бас санитар дәрігері бүкіл саяжай массивін толықтай карантинге жабу туралы қаулы қабылдады. Ауданда індетке қарсы күрес толассыз жүріп жатыр. Әрине, оны бір ғана биліктің күшімен ауыздықтай алмаймыз. Осындайда әрбір адамның жанашырлығы мен жауапкершілігі керек, – деді Момынжан Исламов.
Індет – көрінбейтін жау. Егер дұшпан көрініп келсе, оның жөні бөлек. Адамдар кеудесін отқа тосып, қасық қаны қалғанша шайқасады. Білінбеген соң бейқамдық белең алады. Оның үрейлі мысалдары әлемнің әр түкпірінен естіліп те жатыр.
Індетке қарсы тұрудың жолы біреу. Ол – карантин шараларын қатаң сақтап, тәртіпке бағыну. Алайда қаперсіз кейбір пенделер жағасын жайлаудан келтіріп, мәселеге терең мән бермейді. Жауапкершілікті сезінбегендіктен коронавирусты жұқтырып, оны ары қарай тасымалдаса, бұл қылмыс емей немене?! Қайсыбір мемлекеттерде надандық әрекеттерді террорға теңеп отыр. Соның бәрінен сабақ алғанымыз жөн.
Бүгінгі таңда жұмыстарын уақытша тоқтатқан мекемелер аз емес. Солардың бірі – «Есік» мемлекеттік тарихи-мәдени музейі. Музейдің ғылыми қызметкері Әсел Амарғазиеваға телефон шалдық. Әсел аталған саяжайдың тұрғыны екен.
– Хал сұрағандарыңызға ризамын. «Жетісу» газетінің бізді іздегені көңілімізге дем береді. Менің байқағаным, «Береке» елді мекенінде тәртіп талапқа сай. Көшеде себепсіз жүргендер кездеспейді. Бәрі жергілікті биліктің қадағалауында. Біз «Сабыржан» азық-түлік дүкенінен керегімізді аламыз. Сатушылар өз ісіне сергек қарайды. Дүкен иелері ең алдымен тұтынушылардың қолдарына антисептик шашады. Содан кейін бетпердесіз ешкімді ішке кіргізбейді. Осыған қарамастан аумақтан коронавирус жұқтырған адамдардың табылғаны бәрімізді алаңдатып отыр. Қазір саяжай аумағы толық қоршалып, блок-бекеттер қойылды. Карантин жарияланды. Біз бір нәрсені ерекше ескеруге тиіспіз. Үй көрмей, бел жазбай еңбек етіп жатқан дәрігерлерді, күндіз-түні аяғынан тік тұрған құқық қорғау қызметкерлерін құрметтеуіміз керек. Қалай қиналып жатқандарын түсінуіміз қажет. Азаматтарға беретін көмегіміз сол – карантин тәртібін қатаң сақтауға міндеттіміз. Осы сөзімді газет арқылы баршаға жолдаймын. Біз біріксек қана жеңеміз, – деді Әсел Амарғазиева.
Мұндай кезде үйден шықпаудың өзі – індетке қарсы қолданатын ең үлкен, ең сенімді қару. Көзге көрінбейтін майданда патриоттық борышты, азаматтық міндетті қалай орындау керектігін ешқашан есімізден шығармасақ дейміз.
Болат МӘЖИТ
Еңбекшіқазақ ауданы
Алматы облысы
Сурет ғаламтордан алынды
