Дубай аймағынан елге жеткізіліп, Талдықорған мен Текелі қалаларында арнайы орындарда оқшауланған 135 отандасымыз үйлеріне қайтарыла бастады.
Елге келгенге дейін де Біріккен Араб Әмірліктерінде бірнеше күн карантинде болған бұл жолаушылардың бәрінен тиісті анализ алынып, қорытындысында аурудан таза болып шықты.
Енді Алматы облысы әкімінің тапсырмасына сәйкес, аталған азаматтарды тұрғылықты жерлеріне тегін жеткізіп салу жұмыстары ұйымдастырылды. Атап өтсек, Талдықорған мен Текелі қаласына жеткізілген 135 азаматтың 10-ы — Қостанай, 10-ы — Павлодар, 9-ы — Алматы, 8-і – Шығыс Қазақстан, 6-уы – Ақтөбе, 5-уі – Ақмола, 4-уі – Жамбыл, 2-уі — Батыс Қазақстан, 2-уі – Маңғыстау, 2-уі – Қызылорда, 1-уі – Қарағанды, 1-уі – Түркістан облыстарының тұрғындары. Сол сияқты 31-і – Алматы, 27-сі – Нұр-Сұлтан, 16-сы – Шымкент, 1-уі — Байқоңыр қалаларына тұрғылықты жері бойынша жөнелтіледі.
Алдын ала тиісті облыстар мен қалалардың жедел штабтарына Дубайдан қайтқан азаматтар туралы ақпараттар беріліп, қабылдап алу мәселесі келісілді.
Облыстың бас санитарлық дәрігері Қайрат Баймұхамбетовтің айтуынша, бәрінің денсаулығы қалыпты. Жауапты мамандар қонақтарды Көксу ауданының шекарасына дейін шығарып салады.
Гүлжан ТҰРСЫН
Алматы облысы
