Еңбекшіқазақ ауданы, Есік қаласында карантинге жабылған төрт саяжайдың айналасы арнайы техникамен қазылып, оқшауландырылды.
Есік қаласындағы «Алтын адам», «Көксай», «Алтын алма» және «Береке» саяжайлары бір-біріне жақын орналасқан. «Қазақпараттың» мәліметінше, осы елді мекендердің айналасы қазылды. Бұл — көліктер саяжайдан шығып кетпес үшін арнайы жасалған шара. Жалпы, карантинге жабылған Есік саяжайларында 9 мыңға жуық тұрғын бар.
— Еңбекшіқазақ ауданында жаңадан тіркелген 9 азамат коронавирусты жұқтырған науқастардың бірінің жақын туыстары. Олар дер кезінде оқшауландырылған болатын. Бірден 9 адамның жұқтырғанын ескере келе, Еңбекшіқазақ ауданының бас санитарлық дәрігері осы аталған аудандағы 4 саяжайды карантиге жабу туралы шешім қабылдады. Осыған сәйкес, күштік құрылымдар карантиндік тәртіптің қатаң сақталуын бақылайтын болады. Сонымен қатар, тұрғындарды азық-түлікпен қамтамасыз ету мақсатында осы 4 саяжайдың тізімі жасалды, — деді Алматы облысы әкімінің баспасөз хатшысы Ғалымұрат Жүкел.
Естеріңізге сала кетейік, Алматы облысында коронавирус жұқтырғандар саны 21-ге жетті.
«ЖЕТІСУ-АҚПАРАТ»
