Алматы облысында коронавирус инфекциясы тағы тоғыз адамнан табылды. Тоғыз науқас та Еңбекшіқазақ ауданының тұрғындары. Осыған байланысты Еңбекшіқазақ ауданындағы 4 саяжай массиві бірден карантинге жабылды. Бұл туралы Алматы облысы əкімінің баспасөз қызметі хабарлады.
«Кеше диагнозы расталған 11-ші пациентпен байланыста болған азаматтар провизорлық госпитальға жатқызылып, олардан сол мезетте анализ алынған болатын. Біз қорытындыларды алдық, ауданда тағы 9 адамның індет жұқтырғаны анықталды. Облыстық штабтың келісімімен Еңбекшіқазақ ауданындағы төрт саяжай массиві — «Алтын адам», «Көксай», «Алтын алма» жəне «Береке» карантинге жабылды. Облыс əкімінің тапсырмасымен тұрғындардың тізімі жасалды, қажеттілігіне қарай олар азық-түлікпен жəне қызмет түрлерімен қамтамасыз етіледі», — деді Алматы облысы әкімінің баспасөз қызметі өкілдері.
Еңбекшіқазақ ауданының бас санитар дəрігері қаулы қабылдады. Қазір карантин режимін қатаң сақтауды қамтамасыз ететін қызметтер жұмылдырылды. «Соңғы анықталған 9 адам да коронавирус жұқтырған 11-ші пациенттің жақын туыстары. Барлық азаматтарды сақ болуға шақырамыз», — делінген баспасөз қызметінің хабарламасында.
Еске салсақ, бұған дейін Алматы облысында коронавирустың 12 жағдайы тіркелген болатын. Солардың ішінде қауіпті індет жұқтырған Есік қаласының тұрғыны, яғни, облыстағы 11-ші пациентпен байланыста болғандар қатарында Талғар ауданының тұрғыны да бар еді. Осылайша, 12 сəуірде Алматы облысында коронавирус инфекциясының 21 жағдайы тіркелді. Оның 10-ы Еңбекшіқазақ ауданынан шықты.
«ЖЕТІСУ-АҚПАРАТ»
Еңбекшіқазақ ауданы,
Алматы облысы
Сурет ғаламтордан алынды
