Жастарға қызмет көрсету орталығында «Zhas Talks» жобасы аясында облыстық дене шынықтыру және спорт басқармасының басшысы Нұрбақыт Теңізбаев спорт тақырыбында онлайн сұхбат берді.
Әуелі Нұрбақыт Молдахметұлы өңіріміздегі спорт мектептерінің тыныс-тіршілігін баяндады.
– Облысымыздағы спорт саласына үкімет және облыс әкімдігі тарапынан үлкен қолдау көрсетілуде. Мемлекет басшысы Қасым-Жомарт Тоқаевтың Жолдауындағы бұқаралық спортты дамыту үшін барлық спорттық құрылымдар қолжетімді болу керек деген тапсырмасы облыс әкімінің қолдауымен іске асуда. Облыста 42 мектеп жұмыс істейді. Мұнда 38 мың бала 70-ке жуық спорт түрімен шұғылданады. Сонымен қатар, жоғарғы спорт шеберлігі мектебі және олимпиадалық даярлау орталығы бар. Аймағымызда барлық спорт түрі кең дамыған, – дей келе өрендеріміздің толағай табысына тоқталды.
Иә, облысымыздағы спортшылардың жеткен жетістігі ұшан-теңіз. Атап айтсақ, 2019 жылы төрт жылда бір рет өтетін республикалық спартакиада ойындарында облыс тарландары жалпыкомандалық есепте 3-орынды жеңіп алды. Токио олимпиадасына 7 жолдама иеленді. Біздің облыс республика бойынша ең көп жолдама алған аймақтың бірі. Дүние жүзін дүрліктіріп отырған індеттің таралуына байланысты, олимпиада ойындары келесі жылға шегерілді. Жарыс кейінге шегерілсе де спортшыларымыз жаттығуды тоқтатпайтынын, онлайн жаттығу жүргізілетінін Нұрбақыт Молдахметұлы ерекше атап өтті. Яғни, әр бапкер шәкірттеріне үйде қандай жаттығу жасау керектігін тапсырып, ұялы телефон арқылы бақылап отырады.
Жиын соңында Нұрбақыт Теңізбаев спорт саласы бойынша көрерменнің көкейінде жүрген сауалдарын тыңдап, тұшымды жауап берді.
Айдар ҚАЛИЕВ
Сурет ғаламтордан алынды
