Әлемде және елімізде коронавирустың өршуіне байланысты Талдықорғанның сырттан кіретін төрт жолына санитарлық пост қойылады. Онда санитар-дәрігер, ветеринар, көліктерге дезинфекция жасайтындар және құқық қорғаушылар тұрады.
Мамандар өз салалары бойынша тексеру жасап, сауалнама жүргізеді. Кіргендердің барлығының мәліметін алады. Дене қызуы көтерілгендер қалаға кіргізілмейді. Бірден ауруханаға жөнелтіледі. Сондай-ақ, бұл бекеттерде ауру күдігіне ілінбеген адамдардың үйіне барған соң да не істейтіндері түсіндіріледі. Осындай 14 бекет Іле, Талғар, Қарасай аудандарына да қойылады.
Талдықорғандағы тәулік бойы істейтін 4 санитарлық бекет мына жерлерде орналасқан:
1-ші санитарлық бекет — Алматы қаласынан кіреберісте, Алматы трассасында;
2-ші санитарлық бекет — Қаратал ауданынан кіреберісте, Үштөбе трассасында;
3-ші санитарлық бекет — Ескелді ауданы, Қарабұлақ трассасында;
4-ші санитарлық бекет — Ақсу ауданынан кіре берісте, Үшарал трассасында.
Осы тәулік бойы істейтін санитарлық бекеттерде полиция және СЭС қызметкерлері тепловизорлармен тұрады. Олар барлық қалаға кіретін адамдарды тексереді. Сондай-ақ, барлық келген адамдар арнайы сауалнаманы толтыратын болады.
Алматы облысындағы республикалық, облыстық және аудандық маңызы бар барлық автожолдар ашық, олар жабылмайды.
Гүлжан ТҰРСЫН
Алматы облысы
