Әлемді дүрліктірген коронавирустың біздің елге келгеніне апта өтпей жатып, жұқтырған адамдар саны өсіп үлгерді. Осыған байланысты облыс көлемінде атқарылып жатқан жұмыстар жөнінде облыстық тауарлар мен көрсетілетін қызметтердің сапасы мен қауіпсіздігін бақылау департаментінің басшысы Қайрат Баймұхамбетовтың қатысуымен брифинг өтті.
Департамент басшысы Қайрат Баймұхамбетовтың айтуынша, облысымызда коронавирус ауруын жұқтырғандар тіркелмеген. Сақтық шараларын барынша сақтауға шақырған спикер:
– Бүгінгі күні облыс бойынша шетел асып келген 139 адам оқшауланды. Оның 16-сы үй карантинінде болса, қалғаны стационарлық карантинге алынған. Одан бөлек, адам көп шоғырланатын базарлар мен қоғамдық көліктер залалсыздандырылуда. Қоғамдық тәртіпті сақтау барынша қадағаланып, күзет күшейтілді. Ірі сауда орындарының жұмысы шектеліп, ойын-сауық орталықтары мен кинотеатрлардың, көрмелердің жұмысы тоқтатылды, – деді.
Науқас адам медициналық тексеруден, емделуден, оқшауланудан бас тартса немесе жасырса заңды жауапкершілікке тартылатынын есте ұстаған жөн. Сондай-ақ, мемлекеттік мекемелер белгіленген тәртіпті сақтамаған, бұйрықты орындамаған жағдайда да ҚР әкімшілік құқықбұзушылық заңының 476-бабы бойынша 10 айлық есептік көрсеткіш көлемінде айыппұл салынады не болмаса 15 тәулікке қамауға алынады.
Эпидемиялық-санитарлық шаралар қабылданып, әсіресе, халық көп жиналатын орындарда алдын алу жұмыстары күшейтілген. Пандемияға қарсы қажетті шаралар, оның ішінде, оқшаулау, емдеу және дезинфекция жасау жұмыстары жүргізілуде. Спикер тұрғындарды ресми ақпараттарға ғана сенуге шақырды.
Брифингте барлығын алаңдатып отырған медициналық бетперденің жетіспеушілігі де сөз болды. Қайрат Қажыманұлының сөзіне сүйенсек, қазірдің өзінде Талдықорған қаласында дайындалған 128 мың бетперде ауыл-аймақтағы жергілікті дәріханаларға үлестіріле бастады. Оны дайындауға шикізат та жеткілікті. Шаһардағы «Ажар» тігін фабрикасы, кәсіптік колледждер, басқа да ірі тігінханалар жұмылдырылған.
Айта кетерлігі, егер күдік пайда болса, департамент қарамағындағы зертханаға келіп, қан сынамасын тапсыруға болады. Толғандырған сауалдарға 1406 нөміріне хабарласып, жауап ала алады. Ең бастысы әркім сақтық шарасын сақтауы тиіс. Мамандар әлсін-әлсін қолды жуып, бөлмені желдетіп, мейлінше көп су ішіп тұру керектігін, көпшілік орынға бармаған дұрыс екендігін жеткізді.
Еңлік ҚАБДЕШ
Алматы облысы
Сурет ғаламтордан алынды
