Мемлекеттік саясатты жүзеге асыру, терроризммен, әлемдік түрлі қақтығыстармен күрес, адами құндылықтарды насихаттау идеологтардың негізгі жұмысы. Осы орайда атқарылған істерді саралау мақсатында «Жетісу идеологтарының слетін» өткізу дәстүрге айналуда.
Биыл үшінші жыл қатарынан ұйымдастырылған шараға облыстық тіл басқармасының басшысы Айдар Башбаев, әдеп жөніндегі уәкіл Ғалиасқар Сарыбаев, Текелі қаласының әкімі Бақтияр Өнербаев шақырылды. Олар әлемді алаңдатып отырған мәселелер жөнінде ой толғап, идеологтар жұмысының маңыздылығына тоқталды.
Бұл орайда облыстық ішкі саясат басқармасы ауқымды жұмыс атқаруда. Басқарма басшысы Рустам Алпысбаев ол турасында егжей-тегжейлі баяндап өтті.
– Елбасының, Мемлекет басшысының тапсырмасымен ақпараттық саясатқа үлкен мән берілуде. Оның ішінде мемлекеттік органдардың жұмысы әлеуметтік желі, ғаламтор кеңістігінде таралуына мейлінше көңіл бөлінуде. Мемлекеттік саясат пен әлемде, елімізде орын алып жатқан жағдайлар туралы халыққа дұрыс ақпарат беру маңызды. Осы орайда облыс әкімінің қолдауымен құрылған өңірлік коммуникациялар қызметіне қарасты «Жетісу медиа» алаңының, «Рухани жаңғыру» жобалық кеңсесінің, облыстық талдау және болжау орталығының жұмысын алға тартуға болады. Міне, осы орталықтар мен ішкі саясат құрамына қарасты мекемелердің қызметі барлық көрсеткіш бойынша республикада үздіктер қатарында, – деді.
Осы орайда күн-түн демей ел игілігі үшін қалтқысыз қызмет етіп жүрген идеология саласының мамандары марапатталды. Жамбыл аудандық ішкі саясат бөлімінің басшысы Айткүл Медеуованың атқарған қызметі жоғары бағаланса, Текелі, Қарасай ауданының идеологтары одан кейінгі орыннан көрінді.
Баспасөз хатшыларының да еңбегі еленді. Еңбекшіқазақ ауданының баспасөз хатшысы Динара Төлемісова үздік деп танылса, панфиловтық Нұрбол Қанағат пен алакөлдік Айдана Тынысбекова жыл озықтары қатарынан көрінді. «Ең оперативті баспасөз хатшысы» номинациясын сарқандық Олжас Құрмашев иеленді. «Үздік ақпараттық баспасөз» номинациясына Көксу ауданы әкімінің баспасөз хатшысы Айгүл Айманбекова ие болды. «Ең белсенді әкім» болып Текелі қаласының әкімі Бақтияр Өнербаев танылды.
Алма ЕСЕНБАЕВА
