Шуақты күнге шомылып, көктемнің әр күнін нұрға бөлеп жүретін әйелдер қауымы мереке күні ерекше сыйға ие болады. Сондай үлкен құрметке бөленгеннің бірі — Үштөбе қаласындағы К.Тоқаев атындағы орта мектептің мұғалімі Валентина Спиридонова.
Бүгінде зейнетке шыққан, жасы жетпісті алқымдаған ардагер ұстазды Алматы облысының әкімі Амандық Баталов арнайы барып, 8 наурыз – Халықаралық әйелдер күнімен құттықтады. Атақты детектив жанрының жазушысы Кемел Тоқаев мектебін басқарған, бүгінде жазушы атындағы қорға жетекшілік жасап отырған іскер әйелдің еңбегін ерекше бағалауға болады.
Валентина Григорьевнаның үйіне барған аймақ басшысы ел Президенті Қасым-Жомарт Тоқаевтың құттықтауын жеткізіп, мерейлі мерекемен құттықтады. Атаулы күнде атаусыз қалдырмаған Мемлекет басшысына рахметін айтқан ұстазға облыс әкімі гүл шоқтарын ұсынды. Ақ дастарқан басында шаттық пен берекені, мейрім мен ілтипатты білдіретін ақжарма әңгіме өрбіп, ұстазға қошемет көрсетілді.
В.Спиридонова ұзақ жыл Пионерлер үйін басқарып, 1995 жылы Кемел Тоқаев атындағы орта мектептің директоры болады. Өзі басқарған жылдан бүгінгі күнге дейін мектептің жетістігі төмен түскен емес. Қазір де оқушылардың білім көрсеткіші жоғары. Білікті ұстаздармен қамтылып, мектеп толықтай жаңа жабдықтармен қамтамасыз етілген. Үздік оқу озаттары арнайы Кемел Тоқаев атындағы шәкіртақыны алады. Мұның сыртында аз қамтылған оқушылар мен үздік нәтижеге қол жеткізген оқушылар арнайы жазушы атындағы грантқа ие болады.
Осы күнге дейін елуден аса грант иегері Республикамыздың түпкір-түпкірінде әр салада қызмет атқарып жүр. Қазіргі таңда жиырма екі оқушы аталған грантпен жоғары оқу орнында білім алып жатыр.
Валентина Григорьевна зейнетке шықса да білім ордасында ұстаздық етеді. Мұнымен қоса жазушы атындағы қордың жұмысын жүргізіп, оқушылардың жағдайына қарайласады. Еңбек саласында өзінің де жеткен жетістігі көп. Білім еру ісінің үздігі, Ы.Алтынсарин атындағы төсбелгінің иегері, «Шапағат» медалімен марапатталған. Қаратал ауданының Құрметті азаматы, министрліктің, облыс, аудан әкімдіктерінің Алғыс хаттарын алған білікті ұстаз. Осындай сый-құрметке лайықты жанды Мемлекет басшысы және облыс әкімінің арнайы барып, құттықтауын жеткізіп, ізгі ілтипатын білдіруі талай жылғы қажырлы еңбек пен ұстаздық қасиеттің арқасы екені анық.
Өз кезегінде ардақты ұстаз құттықтап келген Амандық Ғаббасұлына рақметін айтып, алғысын білдірді.
Ришад ТҰРҒАНБАЕВ
Фото — Дмитрий ЕРОФЕЕВ
Қаратал ауданы
Алматы облысы
