«Жетісу» газеті редакциясына Алматы іргесіндегі ауылдан тағы бір хат келіп түсті. «Біз, Алматы облысы, Қарасай ауданына қарасты Райымбек ауылының «Полет» бағбандық серіктестігіне қарайтын ауыл тұрғындары, Қарасай ауданы әкімдігінен біз тұратын ауылдың жолын жөндеп, автобус жүргізіп беруін сұраймыз. Себебі, осы автобустың жоқтығынан, біз, Алматының жоғарғы трасссасы бойындағы «Здоровье» аялдамасынан түскен соң, төмен қарай бір шақырым жолды жаяу жүруге мәжбүрміз», — делінген хаттың толық мәтіні төмендегідей:
Жаздыгүні трассадан төмен қарай үйіне жету үшін немесе керісінше, үйінен трассаға жету үшін осы жолда жаяу кетіп бара жатқан аналарды, үлкен кісілерді көргенде жаның ауырады. Үйге келген қонақтар да ауыр жүктерімен, кішкентай балаларымен трассаға дейін осы 1 шақырым жерді жаяу жүру мүмкін болмағандықтан, кері қайта алмай отырады. Такси шақырса келмейді.
Жол болса ойдым-ойдым. Соның кесірінен, автомашиналар тез істен шығады. Ал қыстыгүні сол ойдым-ойдым жолдың үсті көк мұз болып жатады. Құм сеуіп жүрген коммуналдық мекеме өкілдерін көрмейсіз. Балалар, үлкен кісілер тайып құлап жатады. Ол аздай, үлкен-үлкен иттер бос жүреді. Жолда құлап, иттен қорқып, үйге әзер келеміз. Бір сөзбен айтқанда, бұл жол нағыз қылкөпір.
Алыс аудан болса бір сәрі, Алматының түбінде дәл осындай ауыл бар дегенге сенгің келмейді. Қарасай ауданының әкімдігіне айтар өкпеміз қара қазандай. Келіп, бір сәт осы ауыл тұрғындарымен кездесу өткізбейді, жағдайымызды білмейді. Жазған өтінішімізге саяжайды біз жөндемейміз деген жауап алдық. Сонда кім жөндейді? Бұл саяжай деп аталғанымен, онда тек саяжай тұрғындары ғана тұрмайды, жаңадан салынған қыстық үйлердің тұрғындары да өте көп. Жаңадан салынған үйлерден бір шағынаудан бар десе де болады.
Қорыта айтарымыз, Қарасай ауданының әкімдігі осы саяжай аумағындағы ауыл тұрғындарының өтінішіне бей-жай қарамай, 1 шақырым жерді асфальттап берсе және осы жолмен автобус жүргізсе деген өтінішіміз бар. Жүз емес, бір шақырым ғана жол ғой. Көп қаржы да кетпес, қолға алса, жарасы жеңіл нәрсе деп ойлаймыз. Тиісті орындар осы өтінішімізге құлақ асар, көмектесер деген үміттеміз.
М.ЖАНСЕРІКОВА
Қарасай ауданы,
Алматы облысы
Сурет ғаламтордан алынды
