Талдықорған қаласындағы физика-математика бағытындағы Назарбаев зияткерлік мектебінде БАҚ өкілдері үшін Ашық есік күні өтті.
Кездесу барысында ұстаздар мен оқушылар мектептің өзіндік ерекшеліктері мен онжылдық жетістіктерімен таныстырды. Алғашқы болып сөз алған мектеп директоры Виктор Сосин 2020 жыл – Еріктілер жылы деп жарияланғанын, алайда НЗМ шәкірттері талай жылдан бері осы қызметпен айналысып келе жатқанын, осы орайда он жоба жүзеге асып отырғанын жеткізді.
Атап айтар болсақ, «Қамқор», «Жүрек қалауы», «Көтеріңкі көңіл күй сыйла», «Жақсылық жасауға ұмтыл» атты жобалар негізінде «Айналайын» балалар үйі, сәбилер үйі, «Бәйтерек» күдіз болу орталықтарында болып, ондағы тәрбиеленушілерге ағылшын тілін үйретіп, ертегілер қойып, түрлі шара ұйымдастырады. Ал «Ұрпақтар сабақтастығы» жобасы аясында апта сайын ата-әжелермен кездесу өткізіп, ұлттық құндылықтарымыз бен салт-дәстүріміз туралы да тереңірек біле түседі.
Осы орайда Ашық есік күні «Ерулік» дәстүрін насихаттаған ұстаздар мен оқушылар домбыра мен жетігенде халық күйлерін де орындап, ата-әжелердің алғысына бөленді.
Назарбаев зияткерлік мектебінің оқушылары білімді ғана емес, жан-жақты өнерлі. Өйткені, оқу шаңырағында баланың барлық жағынан лайықты дамуына жағдай жасалған. Бұл орайда хор, домбыра, гитара, театр үйірмелері жемісті жұмыс істеп жатқанын айта кетуге болады. Бұдан бөлек, балалардың бос уақытында теннис, шахмат ойнап, сергуіне де мүмкіндік бар. Бір уақыт аяқтарын созып жатып демалып алуы үшін де жеке бөлме қарастырылған. Робототехника бөлмесінде түрлі жобалар жасап, осы сала бойынша балалардың білімін шыңдау қарастырылған. 51 мың кітап қоры бар кітапхана оқушылардың білімін тереңдетуге, қазақ әдебиетімен қатар әлем әдебиетін оқып меңгеруге қызмет етеді.
Бұл кітапхананың бір ерекшелігі, оқушы өзі оқығысы келген қандай да бір кітапқа тапсырыс берсе, кітапханашы соны сатып алдыртып береді. Мұның бәріне БАҚ өкілдеріне арналған экскурсия барысында көз жеткіздік. Сонымен қатар, ашық сабақтарға қатысып, мұндағы дәрістердің өзгешелігіне тәнті болдық. Мектеп директорымен кездесу, баспасөз мәслихаты ұйымдастырылды. Арнайы бұрыштардан оқушылардың спорт жетістіктері мен сурет көрмелерін тамашаладық.
Міне, осындай бірегей оқу орнында білім алғысы келген оқушылардың 7-сыныптан бастап тегін оқуына мүмкіндік бар. Осы орайда Талдықорған қаласындағы физика-математика бағытындағы Назарбаев зияткерлік мектебінде келер оқу жылы 7-сыныпта білім алу үшін Қазақстан Республикасы Тұңғыш Президенті – Елбасының «Өркен» білім беру грантын тағайындау жөнінде конкурс жариялауда.
Құжаттарды қабылдау 31 қаңтарға дейін жүргізіледі. Мекенжайы: Қаратал ықшам ауданы, 47 үй, тел: 8 (7282) 55-88-80.
Тестілеу 2020 жылғы 14-15 наурыз күндері өтеді. Толық ақпаратты www.nis.edu.kz веб-сайтының «Үміткерлерге» бөлімінен алуға болады. Зейінді шәкірттерге осынау мүмкіндіктен қапы қалмай, Назарбаев мектебінде білім алуға асығыңыздар дегіміз келеді.
Алма ЕСЕНБАЕВА
Алматы облысы
