Талғар ауданында «Тіл» оқу-әдістемелік орталығы» мемлекеттік мекемесінің филиалы ашылды. Айтулы шараға облыстық тілдерді дамыту жөніндегі басқарма басшысы Айдар Башбаев, «Парасат» орденінің иегері, қоғам қайраткері Асылы Осман, Талғар ауданының Құрметті азаматы Нәйлә Үмбетова, басқа да тіл жанашырлары жиналды.
Орталықтың ашылу салтанатында өзге ұлт өкіл-дерінен құралған жас өрендер Абай аталарының жырларынан шашу шашса, танымал айтыскер ақын Даубай Әбдісайт пен ақын Бексұлтан Көлбаев тіл жайлы жүрек тербер өлеңдерін тебіреніспен тарту етті.
– Облыста бірқатар шара атқарылуда. Осы орайда, облыс әкімі А. Баталовтың қолдауын сезініп отырмыз. Соның айқын дәлелі, облыстағы он ауданда бұрын-соңды болмаған оқу-әдістемелік орталықтарын ашуды бастадық, – деген Айдар Карбозұлы филиал қызметкерлерінің мемлекеттік тілді одан әрі кеңейту мен латын әліпбиіне көшу тұрғысында атқаратын жұмыстарына табыс тіледі.
Тіл жанашыры Асылы Осман тәуелсіздік алған 28 жылда мемлекеттік тілдің өз деңгейінде қолданыста болмай, тұғырына қона алмай отырғанына күйінішін жасырмады. «Ашынғанда шығады ащы дауысым» дегендей, отбасында өз бала-шағасымен, немерелерімен қазақша сөйлеспейтіндер бар. Осы мәселе жаныма батады. Көп тілді меңгергеніне қарсылығым жоқ, бірақ өзінің туған тілінің қадірін қашыру дұрыс емес», – деген Асылы Әлиқызы латын әліпбиінің негізінде қазақ тілінің әуезділігін, үндестігін сақтап қалу қажеттігін айтты.
Орталықтың салтанатты түрде лентасы қиылып, данагөй Қарыбай ата ақ батасын берсе, кестелі кимешек киген әжелер шашуын шашты.
Мемлекеттік тілді дамыту мен латын әліпбиіне көшуде маңызды қызмет атқаратын орталыққа ақын Кәмнұр Тәлімұлы басшылық етеді. Мемлекеттік тілдің тұғырына қонуына рухты жыры, тыңғылықты ісімен атсалысып жүрген атпал азаматтың орталықтың ісін ілгерілетуде де тиянақтылық танытары сөзсіз. Мұнда келушілерге тіл маманы, білікті ұстаз Гүлнәр Мамырбаева мен әдіскер Гүлмира Бахиева мемлекеттік тілді меңгеруге латын қарпін тануға, жазуға оқытатын болады.
Ұлбосын ИСАБЕК
Талғар ауданы
