Жансүгіров колледжінде жалпы білім беретін пәндер бойынша аймақтық студенттер олимпиадасы өтті. Оған 18 колледжден білімгерлер қатысты.
Шараны Жансүгіров колледжінің директоры Марат Мәлтекбасов ашып, биыл қайта құрылған аталмыш оқу шаңырағында алғаш рет олимпиада ұйымдастырылып отырғанын атап өтті. Бұл олимпиаданың білімді студенттерді анықтау, сол арқылы сапалы білім беретін оқу орнын белгілеп, болашақта тәжірибе алмасу мақсатында өткізіліп отырғандығын жеткізді. Олимпиадаға қатысушы білімгерлерге сәттілік тіледі.
Қатысушылар ең негізгі базалық бес пән – математика, қазақ тілі мен әдебиеті, орыс тілі мен әдебиеті, ағылшын тілі және информатика бойынша бақ сынады. Сынақ ауызша және жазбаша екі кезең бойынша өтті. Студенттер біліміне І. Жансүгіров атындағы Жетісу мемлекеттік университетінің оқытушы-ғалымдары баға берді. Мұнымен қатар тәуелсіз сарапшылар тағайындалып, басқа колледждерден келген ұстаздар бақылаушы ретінде қатысты.
Жеңімпаздар командалық түрде және жекелей марапатталды. Командалық сынақта Жансүгіров, Талдықорған агротехникалық, Алматы облысының қызмет көрсету және тамақтандыру саласындағы инновациялық технологиялар, Есік гуманитарлық-экономикалық, Алакөл гуманитарлы-техникалық, Көксу ауылшаруашылық колледждерінің студенттері жүлделі орын тұғырынан көрінді. Сондай-ақ, жекелей жеңімпаздар қатарында Жансүгіров колледжінің білімгерлері Райхан Букенова, Алексей Дмитриев, Кәмшат Макеева, Дарья Светличная, Жаркент гуманитарлы-техникалық колледжінің студенті Нұршат Сағынбаева, Текелі кәсіптік колледжінің білім алушысы Юлия Чуприна есімді студенттерді ерекше атай аламыз. Талдықорған жоғары политехникалық колледжінің студенті Санжар Қабаев ерекше білім нәтижесі үшін марапатталды.
Аружан Тнейбаева,
Абылайхан атындағы Қазақ халықаралық қатынастар
және әлем тілдері университетінің 2 курс студенті
