Облыстық «Жетісу» газеті – ұзақ жылдан бергі сырласып келе жатқан серігім. Ұстаз болып еңбекке араласқан кезімнен «Жетісу» шаңырағымның төрінен табылып келеді.
Біздің аудандағы мұғалімдер қауымы да өздеріне қажетті педагогикалық басылымдармен қатар облыстық басылымға біркісідей жазылады. Өйткені «Жетісудың» беттерінде ұстаздардың танымын арттыратын әрі тәрбиелік мәні зор мақалалар жиі жарық көріп тұрады. Таулы өлкеден шыққан дара тұлғалар, ақындар мен аузы дуалы шешен, көсемдер, ел мен жердің қорғаны болған батыр бабаларымыз туралы материалдар да жүйелі жарияланды. Хангелді, Райымбек, Жетен, Әлмерек, Шоған абыз жайында, Қарқара жерінің тарихи құндылығы, онда тұтанған әйгілі Қарқара көтерілісі, оның жетекші тұлғалары Ұзақ пен Жәмеңке, тағы басқалар туралы тереңірек сөз қозғап жүрген де осы басылым. Ғасырлық тарихы бар газетіміздің ғұмыры ұзара берсін деп тілеймін!
Рысалды ТАУДАРБЕКОВА,
Кеген аудандық білім бөлімінің басшысы
