ҚР Премьер-Министрі Асқар Маминнің төрағалығымен өткен Үкімет отырысында еңбек қатынастарын реттеу мәселелері қаралды. Жиында ҚР Еңбек және халықты әлеуметтік қорғау министрі Біржан Нұрымбетов, Кәсіподақтар федерациясының төрағасы Ерәлі Тоғжанов, Үкімет басшысының орынбасары Бердібек Сапарбаев, тағы да бірқатар облыс басшылары атқарылған жұмыс пен орын алған кемшіліктерді түзету барысын және еңбек нарығын реттеу жұмыстары туралы баяндады.
Баяндамашылардың айтуынша, ҚР Тұңғыш Президенті – Елбасы Нұрсұлтан Назарбаев және Мемлекет басшысы Қасым-Жомарт Тоқаевтың назарындағы басты міндеттерінің бірі – кәсіпорындарда әлеуметтік тұрақтылықты қамтамасыз ету, жұмыскерлер үшін қауіпсіз еңбек жағдайларын жасау. Қазіргі таңда бұл салада тұтас заңнамалық база бар, үш жақты әлеуметтік әріптестік қарастырылған, қауіпсіздік техникасын сақтау және жарақаттануды азайту шаралары қабылданып жатыр. Осындай жүйелі жұмыстың нәтижесінде, еліміз биыл жаһандық бәсекеге қабілеттілік индексінің «Еңбек нарығының тиімділігі» факторы бойынша 30-орыннан 25-орынға көтерілді.
Десе де, бұл барлық жұмысты тындырып тастадық дегенді білдірмейді. Қазақстанда 6,7 млн.-нан астам жалдамалы жұмыскер жұмыс істейді. Осы жылдың 1 қаңтарынан бастап ең төменгі жалақы бір жарым есеге – 42,5 мың теңгеге дейін өсті. Бірақ жалақы ісі бойынша берешек кәсіпорындар да бар. Олар Нұр-Сұлтан қаласы, Ақтөбе, Алматы және Түркістан облыстарында.
Жиынды қорытындылаған Үкімет басшысы биыл қабылданған Өндірістік жарақаттануды азайту жөніндегі жол картасын іске асыруды жандандырып, өндірістегі жазатайым оқиғалардың алдын алу мен ескертуге назар аударуды тапсырды. Сондай-ақ, Денсаулық сақтау министрлігіне еңбек министрлігі және Кәсіподақтар федерациясымен бірлесіп, кәсіптік ауруларды болдырмау мақсатында тиісті шараларды қабылдап, кәсіптік патологиялық көмек көрсетуді күшейту тапсырылды.
Қажет АНДАС
