Алматы облысында атом электр стансысының құрылысы жайлы ешқандай талқылау да, аралау да болған емес. Аймақ басшысы Амандық БАТАЛОВ осылай деп мәлімдеді. Бұл туралы «Қазақпарат» агенттігі жазды.
«Бірден айтайын, иә, ол туралы әңгіме болды. Бірнеше нұсқа болғанын да білесіздер. Алматы облысында, Жамбыл өңірінде, Балқаш көлінің маңында бірнеше нұсқа қарастырылған еді. Тағы бір нұсқа ретінде Шығыс Қазақстан облысы айтылды. Бірақ мұның бәрі сөз күйінде күйінде қалды. Ешқандай жерді қарастыру, талқылау, арнайы барып жерді көру – мұның бәрі болған емес. Оны ашық айта аламын», — деді Алматы облысының әкімі Орталық комманикациялар қызметінде өткен баспасөз мәслихатында.
Еске сала кетсек, осы жылдың сәуірінде Семей қаласының зиялы қауым өкілдерімен кездескен Мемлекет басшысы Қасым-Жомарт Тоқаев атом электр стансысының құрылысына қатысты ойымен бөліскен болатын. Мемлекет басшысы ел халқының басым бөлігінің пікірі ескерілместен АЭС құрылысы туралы шешім қабылданбайтынын айтқан еді. Өз кезегінде Энергетика министрі Қанат Бозымбаев «Қазақстанда атом электр стансысы салына ма?» деген сұраққа жауап беріп, «халық наразы болса, салмаймыз» деген болатын.
Нұр-Сұлтан қаласы
Сурет ғаламтордан алынды
