Жуырда Санкт-Петербург қаласында ІІ Еуразиялық әйелдер форумы өткен болатын. Форум аясында әлемнің әр мемлекетінен қатысқан ЮСИМАС Халықаралық академиясының 150 шәкірті өз мүмкіндіктерін сынауға мүмкіндік алды. Бұл жарысқа Қазақстаннан 30 оқушы қатысса, соның екеуі Талдықорған қаласының дарынды қыздары.
Санкт-Петербург политехникалық колледжінде өткен ментальді арифметикадан қыздар арасындағы жарыстың ұзақтығы 26 минут 26 секундты құрап, ұзақтығы бойынша рекорд жасалды. Осылайша бұл жарыс Әлемдік және Азиялық рекордтар кітаптарына енді. Эстафета қатысушылары 30 000 есеп шығарды. Талдықорғандық дарынды шәкірттер – №2 орта мектептің оқушысы Томирис Жұмабаева мен №16 орта мектеп-гимназиясының оқушысы Айару Бақытжанқызы үздік өнер көрсеткені үшін арнайы диплом және сертификатпен марапатталды. Бұл сайысқа жетісулық оқушылардың қатысуы ментальді арифметиканың қыр-сырын меңгерткен жетекшісі Шынаргүл Сұлтанова және демеушілік көрсеткен ата-аналарының арқасында мүмкін болды.
Дарынды шәкірттердің Санкт-Петербургқа барған сапарынан алған әсері айрықша. Олар Ресей, Индия, Шри-Ланка сынды мемлекеттерден келген өздері қатарлас қыздармен танысып, қаланың көрікті жерлерін, Нева жағалауын аралаған. Осылайша бойларына күш-қуат жинаған қыздар әлі талай әлемнің ірі қалаларында болып, үлкен сайыстарды бағындырарына сенімді.
Жалпы ЮСИМАС ментальді арифметикасы 4-14 жас аралығындағы балалардың ақыл-ойын дамытатын тамаша бағдарлама. Азия елінде 1993 жылдан бастау алды. Бүгінде әлемнің 80 мемлекетінде 5000 орталығы бар. Жыл сайын Халықаралық академия әлем бойынша 8000 жас дарынның басын қосып, ірі сайыстар өткізеді. Жарыс ережесі бойынша балаларға 8 минут ішінде шешуге тиіс 200 есеп беріледі.
Бұл жолғы сайыста ең жас қатысушы 5 жаста болды. Осыдан-ақ халықаралық бағдарламаның жетістігін, болашақ жас дарындарды шыңдаудағы мүмкіндігін сынап бағуға болады. Әлемдік жарыста ел абыройын асқақтатып қайтқан шәкірттердің бұдан да биік додалардан көрінері сөзсіз.
Алма ЕСЕНБАЕВА,
“Жетісу”
