Талдықорған қаласында облыс әкімдігі мен «GlobalGeneration» жауапкершілігі шектеулі серіктестігі арасында жылу электр стансысын салу жөніндегі инвестициялық жоба бойынша өзара ынтымақтастық жөнінде меморандумға қол қойылған болатын. Аталмыш жоба енді қос тарап арасындағы келісімшарт негізінде іске асатын болады. Осыған байланысты облыс әкімінің орынбасары Айдарбек БАЙЖАНОВ қытайлық делегаттармен кездесті.
– Облысқа қош келдіңіздер! Инвестициялық жобаны бірлесе жүзеге асыруда біз сіздермен тығыз қарым-қатынаста және жемісті еңбек етеміз деген ойдамыз. Қуаттылығы 400 МВт құрайтын бұл стансының тек Талдықорған қаласы емес, сондай-ақ, облыс үшін де әлеуметтік маңызы зор, – деп сөз бастаған Айдарбек Естебекұлы аталған жоба бағытында жүріп жатқан жұмыстар жөнінде қысқаша баяндады.
Басқосуда инвесторлар жылу электр стансысының тиімділігі жөнінде айтып берді. Жалпы жоба құны 61 млрд. теңгеден асады. Оның он бес пайызы қытайлық «GlobalGeneration» компаниясының қаржысы. Яғни, мемлекеттік жекеменшік әріптестік негізінде жүзеге асатын жобаның қаржы мәселесі шешілген. Тіпті, қажетті жер телімдері де бөлінген. Барлығы 80 гектар аумақта бой көтеретін стансыда алдағы уақытта 500 адамға арналған жаңа жұмыс орындары ашылмақ.
Енді тек жобалық-сметалық құжаттамасын дайындау қажет. Қазіргі кезде осы бойынша тиісті жұмыстар жоспарға сәйкес жүріп жатыр. Кездесуде, сондай-ақ, бұл бағытта әзірге ешқандай мәселелер мен кедергілердің жоқ екені, осы құрылыс бойынша әлі талай жиынның өткізілетіні сөз болды. Осыған байланысты облыс әкімінің орынбасары аталған салаға жауапты мамандарға нақты тапсырмалар жүктей отырып, бұл бағыттағы жұмыстарды жіті бақылауда ұстау керектігін міндеттеді.
Айгүл Байжұмақызы
