Елбасы Н. Назарбаевтың Жарлығымен әкімшілік орталығы Кеген ауылы болатын жаңа аудан құрылғалы бері аттай төрт ай зулап өте шықты. Сол күннен бері жаңа ауданда бөлімдер, мекемелер қайта құрылып, жұмыстарын жүргізуде. Соған орай тағайындаулар жиі болып, жергілікті халық өңірге келіп жатқан мамандармен танысуда.
Кеген ауданы әкімдігінің мәжіліс залында өңірлік активтің басын қосқан келелі жиын өтті. Оның жұмысын ашып, жүргізіп отырған аудан әкімінің орынбасары Қайрат Омархалық күн тәртібіндегі маңызды мәселеден хабардар етті. Жиынға арнайы келген облыс прокурорының орынбасары Саян Бәкіров ҚР Бас Прокурорының бұйрығымен Кеген ауданының прокуроры қызметіне Самат Құрманәліұлының тағайындалғанын атап айтты.
Жиналыста аудандық ақсақалдар кеңесінің төрағасы, ауданның Құрметті азаматы Сабыр Досымбеков, аудандық мәслихаттың хатшысы Нұрбай Советов және Райымбек ауданының прокуроры Шәміл Құтелов сөз алып, жаңа тағайындалған аудан прокурорының Кеген өңірінде жемісті жұмыс жасауына тілектерін білдірді. Жиын соңында мінберге көтерілген Кеген ауданының прокуроры Самат Құрманәліұлы өз атына айтылған ізгі тілектерге ризашылығын білдіріп, аудан халқымен, мекеме-ұйым басшыларымен бірлесе жұмыс жүргізетінін сөз етті.
Қанат БІРЖАНСАЛ
Кеген ауданы
