Талдықорғанда газдандыру жұмыстары жүргелі жауапты компаниялардың салғырттығынан қала іші жолдары бүлініп, өз кезегінде ол жүргізушілердің наразылығын тудыруда. Осыған орай облыс әкімінің орынбасары Айдарбек БАЙЖАНОВ шаһарды аралап, ондағы істеліп жатқан жұмысты көзбен көріп қайтты.
Жоба бойынша газ құбырын тартқан компания жол бойында қазылған шұңқырды да жамап-жасқауға жауапты. Алайда жұмыс барысындағы осы бір қарапайым қағидатты сақтамай отырған серіктестіктер де бар. Мәселен, Желтоқсан көшесіне газ құбырын тартқан «Тургаз» компаниясы бүлінген жолды жөндеуге келгенде салғырттық танытып келеді. Соның салдарынан аталған жобаның атқарылу мерзімі де белгіленген кестеден едәуір кешіккен. Бұған құрылысты бақылауға алмаған теникалық қадағалаушы маман кінәлі екені айтылды.
– Біз осындай 3 техникалық қадағалаушы маманға сәулет және қала құрылысы басқармасы арқылы айыппұл салуды ұсынып отырмыз. Соның нәтижесінде алдағы уақытта мұндай олқылықтарға жол берілмейді, – дейді Айдарбек Естебекұлы.
Мамандардың айтуынша, жол жөндеу жұмыстарының шабандығына басқа да себептер жоқ емес. Айталық, асфальт төселмей тұрып құбырды толық тексерістен өткізу керек. Ондағы мақсат біреу – аталған материалдың бүтін-бүтін еместігіне нақты көз жеткізу. Тиісінше, тесігі болса қайта жамалмақ.
Осы ретте «ЖетісуОблГаз» ЖШС директорының орынбасары Рашад Иманмәдиев бұл да мердігерлердің жұмыс мерзімін кешіктіруіне себеп болып отырғанын айтты.
– Яғни, жолды жасап тастадық делік, одан кейін құбырдан ақау байқалса ше? Міне, екі жұмыс жасағанның көкесі сонда болмақ. Оған кеткен ақша желге ұшады деген сөз. Сол үшін тұрғындар кейбір жайттарға түсіністік танытқаны жөн, – дейді Рашад Иманмәдиев.
Кездесу соңында өңір әкімінің орынбасары аталған бағыт бойынша жауапты деп танылған құрылсшы мамандарға шаһарды апта сайын аралап тұратынын және газ тарту мен жол жөндеу шаруасының ерекше бақылауда болатынын жеткізді. Оған қоса мердігерлер өз жұмыстарын тиянақты атқармаса лицензиясынан айырылып қалуы мүмкін екенін айтып, құрылыс жұмыстарын кестеден кешіктірген компания өкілдеріне қатаң ескерту жасады.
Қ. ӘБДІҒАПАР.
