Көпбалалы ана Ахит Даурен «Қазақстан Республикасының еңбек нарығын дамытудың 2024 – 2029 жылдарға арналған тұжырымдамасы» шеңберінде мемлекеттен қайтарымсыз грант алды.
Балаларының несібесі үшін кәсіппен айналысуды жөн көрген Ахит қандай іспен шұғылданатыны жайлы ұзақ ойланды. Торт пісіретін құрбысына барып кеңесті. Ол бизнеспен шұғылдану үшін табандылық керек екенін айтты. Құрбысы басқа жаққа қоныс аударды да жалға алған орнын Ахитқа берді. Сонымен кәсіпкер келіншек сұлулық салонын ашуды жөн санады. Себебі, бала кезден шаш күтімімен айналысқанды ұнататын. Соның қыр-сырын интернеттен қарап, үйренетін. Шаруаны бастауға дайынмын деген кезде сұлулық салонын ашуға бел буды. Көпшілікке адал қызмет көрсетіп, бастаған ісін жан-жақты меңгеруді мақсат етті.
Адам ниеттенсе алмайтын асу жоқ. Сонымен әбден «пісіріп» барып ұсынған жобасы бірден қабылданды. Үкімет көпбалалы анаға 1 млн. 400 мың теңге қайтарымсыз грант берді.
Ахит ашқан салонның ерекшелігі – бастың терісін емдейді. Алдымен бас терісін аппарат арқылы зерттейді. Кінәрат қайда екенін бағамдайды. Тексергенде терінің кемшіліктері байқалады. Терінің кеуіп, шаштың түсуінің өз себебі бар. Адам уайымдағанда, күйзеліске түскенде шаш түсіп, тері зақымданады. Ахит осындай шаш терісін емдеп, арнайы күтім жасап, өсіреді.
Бұл шаштараздың тағы бір ерекшелігі – мүмкіндігі шектеулі адамдарға тегін қызмет көрсетеді. Ол грант қорғағанда денсаулығында ақауы бар адамдардың шашын ақысыз алатынын айтқан. Мүгедектігін растайтын анықтамасы бар адамдар бүгінде мұнда көптеп келеді. Сондай-ақ кәсіпкер бірнеше адамды жұмыспен қамтып отыр.
Салонда тырнақ бояйтын Анар Садуақасова «Мансап» орталығы арқылы тегін оқып келген. Оны басында тәжірибең жоқ деп ешкім жұмысқа алмапты. «Айару» салоны қабылдаған соң барын салып еңбек етіп, тәжірибесін шыңдаған. Анардың айтуынша, біраз уақытта тырнақ күтімін едәуір меңгеріп, келушілердің көңілінен шығуда.
«Айару» салонының шеберлері қас-кірпік күтімін жасап, ретке келтірумен де шұғылданады. Алдағы уақытта халыққа қалтқысыз қызмет көрсетуде заманауи құрылғылар алып, ісін кеңейтпек.
Гүлжан ТҰРСЫН
