Балуандар атынан ауып түсті
Рио Олимпиадасының қызған шағы. Үздіктер алға озып, бірқатар елдің спортшылары жүлдені де қоржынға тоғытып үлгерді. Біз де әдеттегідей медальдің сыңғыры естіліп қалар деген оймен Риоға қарай құлақ түруден жалыққан емеспіз. Әсіресе, спорттың басқа түрін былай қойғанда оң жамбасымызға келетін балуандар бәсекесіне көп үміт артатынымыз анық. Бозкілемге шыққан қос балуанымыз бұған дейін талай додада жүлде салған оғландар. Бұл жолы да жүлдеден құралақан қалмаспыз деген ойымыз селге кетті.
Сонымен грек-рим күресінен екі отандасымыз шыққан. 59 келіде Алмат Кебіспаев пен 75 келіде Досжан Қартықов. Бірінші болып бастаған Алмат Кебіспаев.
Алмат төрт тағанда жақсы жұмыс жасайтын балуандардың бірі. Белінен қапсыра құшақтап бойынан асырып, болмаса арлы-берлі есін шығарып айналдырып жіберетін. Бірақ Рио Олимпиадасында төрт тағандағы қарсыластарына сол бір әдістерін жөнді көрсете алмады. Отандасымыз алғашқы белдесуін ресейлік Ибрагим Лабазановқа қарсы өткізді. Көрші елдің балуанын атынан аударып тастағанымен, екінші белдесуінде жапонның балуанына шамасы жетпеді. Тек алтын үшін келгендей атойлап шыққан жапондық Шинобу Ота отандасымызды 0:6 есебімен ұтты. Белдескенді баудай түсірген Жапон жігіт ақтық сынға шықты. Осының арқасында Алматқа жұбаныш белдесуге мүмкіндік берілді.
Бірінші Хамид Сорианмен болған жұбаныш белдесуде Алмат бар күш-жігерін сарп етіп қойды. Атағы жаһанға жайылған ирандықпен алысу оңайға түспеді. Алматтың пайдасына берілген төрт тағанда Сориан өзіне қарсы әрекет жасап, қажетті ұпайларға ие болды. Есеп – 0:7. Сорианның Кебісбаевқа жасалған шабуылына жақсы жауап жамбас болды. Жамбасқа алып жықты, астына басып жата қойды. Таза жеңіс! Бұл күресі үшін мен Алматқа басымды идім. Бүкіл Иран халқының 59 келідегі үміттерін көз алдарында аз ғана уақыттың ішінде парша-паршасын шығарды.
Екінші жұбаныш белдесу. Екі ескертумен норвег Стиг Андре Бергеменнен жеңілді. Алмат бұл жерде еш әрекетсіз төрт тағанды жіберіп қойды. Бергеменді Лас-Вегастағы әлем чемпионатында ары да, бері де илеп еді… Әттең!
Ауыр қарсыластар, ауыр күн болды, ауыр сәттер орын алды.
Алмат Кебісбаевтың жарқын жеңістері әлі алда. Мен оған сенемін. Әлі-ақ төрт тағаннан талай балуанды жұлып алып тік көтеріп тастайды. Ал Досжан Қартықов болса, бірінші белдесуін жеңіспен бастағанымен, екінші кездесуінде жеңіліс тапты. Нақтырақ айтқанда қазақстандық балуан Досжан Қартықов ширек финалға шыға алмады. 75 келіге дейінгі салмақта белдесетін отандасымыз екінші белдесуінде әзірбайжандық Эльвин Мурсалиевтен ұтылды.
Кездесудің алғашқы үш минуты қарсыластар тең дәрежеде өнер көрсетіп, 0:0 есебімен аяқталды. Ал екінші кезең 5:1 есебімен әзірбайжандықтың пайдасына шешілді. Досжан бірінші белдесуінде грузиндік Зураби Датунашвилиден басым түскен еді.
Риода өтіп жатқан Олимпиада ойындары қызып келеді. Қазақстан бокс құрамасының қарқыны көңіл қуантады.
Олимпиадалық ойындар бокс жарысының 1/4 финалында 81 келіге дейінгі салмақтағы қазақстандық Әділбек Ниязымбетов әзірбайжан Теймур Мәмедовпен кездесіп, 3:30 (30:27, 30:27, 30:27) есебімен жеңіске жетті.
Осы арқылы біздің боксшы медальдар үлесі жүргізілетін шеңберге жетті.
Әділбек енді 17 тамыз күні сағат 3:30-да ұлыбританиялық Джошуа Буатсимен жартылай финалдық кездесуге шығады.
Тегі ганалық Буатси өте күшті. Ол 1/8 финалда өзбек Элшод Расуловты үш рет ұрып құлатып, соңғысында нокаутқа жіберген. Ал 1/4 финалда алжирлік Абделхафид Бенчлабаны екі рет нокдаунға түсіріп, айқын басымдықпен ұтты.
69 келі салмақта Данияр Елеусінов венесуэлалық боксшы Габриэль Маэтродан басым түсіп, жартылай финалға жолдама алды. Қазақстандық боксшылар арасында финалға ең бірінші жолдаманы 91 келі салмақ дәрежесінде жұдырықтасатын Василий Левит алды. Ол кубалық спортшы Эрисландо Савонды 3:0 есебімен айқын жеңді. Осылайша, Левит бүкіләлемдік бокс сериясында Савонға кеткен есесін қайтарды. Финалда жерлесімізге сәттілік тілейміз. Аса ауыр салмақта жерлесіміз Иван Дычко әзірбайжандық қарсыласы Могамадрасул Меджидовты кездесудің екенші раундында теxникалық нокаутпен жеңіп, келесі айналымға өтті. Бокс құрамасына қазақ елі мол үміт артып отыр.
Әмір САНА.
