Облыстық ауылшаруашылық басқармасының басшысы Сексенбай Бекішов шаруашылықтарды 2017 жылы себілетін өнімділігі жоғары қант қызылшасы тұқымымен қамтамасыз ету төңірегінде «дөңгелек үстел» өткізді.
Шараға «Жетісу» ӘКК» ҰК» акционерлік қоғамының өкілдері, егіншілік және өсімдік шаруашылығы зерттеу институтының мамандары, аудандық ауылшаруашылығы бөлімі басшылары, агрономдар және бірқатар шаруа қожалықтары қатысты.
Отырысқа төрағалық еткен Сексенбай Бекішов Елбасының тапсырмасын орындау мақсатында облыс әкімі Амандық Баталовтың қолдауымен бірқатар іс-шараларды ұйымдастырғандарын, соның нәтижесінде ағымдағы жылы қант қызылшасының көлемі 6809 гектарға жеткенін айтты.
Облыс әкімдігі тарапынан қант қызылшасын сепкен шаруашылықтарға биыл да қолдау көрсетілуде. Тұқым сатып алуға жергілікті бюджеттен қаражат бөлініп, 6100 гектар егістік алқапқа «Жетісу» ӘКК» ҰК» акционерлік қоғамы арқылы Франция, Германия елдерінен тасымалданған тұқымдар себілді. Осы ретте шаруашылықтарға берілген тұқым күзгі өнім есебінен қайтарылмақ. Ал қалған 712 гектар алқапқа «Қамқорлық» ЖШС-ның тұқымы пайдаланылды.
Облыстық ауылшаруашылығы басқармасы басшысының айтуынша, бүгінгі таңда өңір үшін ең маңызды мақсаттардың бірі тұқым шаруашылығын жолға қою болып отыр. Жыл сайын тек қана тұқым сатып алу үшін қомақты көлемде қаржы бөлінуде.
– Қазіргі таңда сатып алынатын Франция, Германия мемлекеттері тұқымдарының сапасы өте жоғары екендігін мойындауымыз керек. Алайда, мұндай қымбат тұқымдарды жыл сайын сатып ала беруге шаруашылықтардың шамасы жете бермейді. Сол себепті, біз бұл бағытта шетелдерге тәуелді болмай, өзіміздің отандық өнімді мықтап қолға алуымыз керек, – деді Сексенбай Бекішов.
Бұдан әрі мамандар тарапынан отандық тұқым өндіруге бізде толық негіз бар екені айтылды. Мәселен, осы саламен көп жылдан бері айналысып келе жатқан Панфилов ауданындағы «Қамқорлық» жауапкершілігі шектеулі серіктестігінің базасынан сапалы әрі толерантты отандық өнім өндіруге болады. Осы орайда аталған серіктестіктің директоры Әлен Жолдасов отандық тұқымның артықшылығы жайлы айтып берді. Оның пікірінше, бұл тұқым түрлі зиянкеске төзімді әрі климатқа мейлінше бейімделген. Төл тұқым төңірегінде жиынға қатысушылар да өз ойларын ортаға салды. Осы орайда Қазақ егіншілік және өсімдік шаруашылығы ғылыми-зерттеу институтының бас директорының орынбасары Шынболат Рысқалиев пен «Жетісу» ӘКК» ҰК» АҚ-ның азық-түлік тауарларының тұрақтандыру қорын басқару департаментінің директоры Қуаныш Тоғайбаев сөз алып, тұқым шар- уашылығы туралы пікірін білдірді.
Жиын соңында облыстық ауылшаруашылығы басқармасының басшысы Сексенбай Бекішов мамандар тарапынан берілген ұсыныстардың облыс әкіміне жеткізілетінін айтты.
Қ. ӘБДІҒАПАР.
