Қоғамның дамуы заңдардың сапасына тікелей байланысты. Уақыт өзгерген сайын адамдардың сұранысы, экономикалық қатынастар, цифрлық технологиялар мен қоғамдық үрдістер де өзгереді. Сондықтан заң шығару жүйесі де заман талабына сай үнемі жетіліп отыруы қажет. Осы тұрғыдан алғанда, Құрылтайдың құрылуы – мемлекеттік басқару жүйесін жетілдіруге бағытталған маңызды саяси шешім.
Меніңше, Құрылтайдың ең басты ерекшелігі – заң шығару қызметін барынша нәтижеге бағыттауында. Заң қабылдау тек құқықтық рәсім емес, ол миллиондаған азаматтың өміріне әсер ететін жауапты шешім. Сондықтан әрбір заң қоғамның нақты қажеттілігіне негізделіп, ұзақмерзімді дамуға қызмет етуі тиіс. Қазір мемлекет алдында экономиканы әртараптандыру, кәсіпкерлікті қолдау, әлеуметтік қорғауды күшейту, цифрландыру мен ұлттық қауіпсіздікті қамтамасыз ету сияқты ауқымды міндеттер тұр. Осындай бағыттардың әрқайсысы сапалы құқықтық негізді қажет етеді. Сондықтан Құрылтай қабылдайтын заңдардың мазмұны мен тиімділігі ерекше маңызға ие.
Құрылтай қоғамдық мүдде мен мемлекеттік саясаттың арасындағы байланысты күшейтеді. Заңдар белгілі бір топтың емес, бүкіл қоғамның игілігі үшін қабылдануы керек. Бұл – құқықтық мемлекеттің басты қағидаларының бірі. Сондықтан заң шығару кезінде түрлі көзқарастың ескерілуі, ашық талқылау мен кәсіби сараптаманың жүргізілуі қабылданатын шешімдердің сапасын арттыра түседі.
Құрылтайдың тиімділігі қабылданған заңдардың санымен емес, олардың қоғамға тигізетін нақты пайдасымен өлшенуі тиіс. Құрылтайды тек заң шығаратын орган ретінде емес, еліміздің құқықтық жүйесін жетілдіруге, мемлекеттік басқаруды жаңғыртуға және қоғамның тұрақты дамуына бағыт беретін маңызды саяси институт ретінде бағалаймын. Оның басты мақсаты – әділетті, тиімді және халық мүддесіне қызмет ететін заңнамалық жүйені қалыптастыру.
Думан ДОШКЕЕВ,
Жетісу облыстық сотының судьясы
