Талдықорған қаласында 1 мамыр – Қазақстан халқының бірлігі күніне орай мерекелік шара өтті. «Жастар» саябағында спорттық ойындар, түрлі этнос өкілдерінің көрмелері мен дәстүрлі тағамдары ұсынылды.
Жетісу облысының әкімі Бейбіт Исабаев өңір тұрғындарын құттықтап, бұл мейрамның маңызы туралы айтты.
Қазақстан халқы Ассамблеясының 30 жылдық мерейтойы аясында көптеген іс-шаралар атқарылды. Жетісу өңірінде «Достық аллеясы» ашылып, көркем фильмдер түсіріліп, кітаптар шығарылуда. Сонымен қатар, Талдықорған, Жаркент және Үштөбе қалаларында муралдар салынып, этностар арасындағы ынтымақтастықты нығайту мақсатында түрлі жобалар жүзеге асырылуда. Бұл іс-шаралар бейбіт те берекелі өмірдің бағасын ұғуға, қоғамдық келісімді нығайтудағы жаңа міндеттерді іске асыруға тың серпін береді деп сенеміз, — деді.
Қазақстан халқы Ассамблеясының сессиясында Президент Қасым-Жомарт Тоқаев Панфилов ауданында Достық үйін ашу қажеттігін айтқан еді. Бұл жұмыс жақын арада жүзеге асатын болады.
Облыс әкімі құттықтау сөзінде Жетісу халқының бірлігі мен ынтымақтастығының арқасында өңір экономикасы қарқынды дамып жатқанын да атап өтті.
«Жетісу облысы құрылған үш жылдың ішінде экономикамыздың өсуі біздегі ынтымақтастықтың нәтижесі. Бұл жетістіктер болашақта да жалғасын табатынына сенімдімін», — деді ол.
Бейбіт Исабаев өңір тұрғындарына әлеуметтік-экономикалық дамуға қосқан үлестері үшін алғыс айтып, баршаға денсаулық, бақ-береке, және еліміздің өркендеуі үшін табысты еңбек тіледі.
Шара барысында әртүрлі этнос өкілдерінің мәдениеті, ұлттық киімдері мен тағамдары ұсынылып, Жетісу жұртшылығы бірліктің маңызды құндылықтарын сезініп, ынтымақтың мәнін терең ұғынды.
Салтанатты жиында қала халқы мерекелік концерттік бағдарламаға куә болып, шат-шадыман күйге бөленді.
Мәулен Әнербай
Суретті түсірген Жұмабай Мұсабеков
